Ujaruk

Aqqutikitsup aamma Ungalliup Qaqqaasa eqqaanni Sisorarluni takornariartitsineq

Matumuuna Sisimiut avannaata tungaani Aqqutsikitsup aamma Ungalliup Qaqqaasa eqqaanni sumiiffinni sisorarnermik timersuuteqarnermut, unnuisitsisarnernut, allanillu takornarissat suliaqartinnerinut tunngatillugu takornariartitsinermik suliaqarnissanut akuersissut pillugu qinnuteqarniartut Qeqqata Kommunianik suleqateqarlutik Naalakkersuisut qaaqqusipput

24.05.2019

Aqqutsikitsup aamma Ungalliup Qaqqaasa eqqaanni sisorarnermik takornariartitsinerup neqeroorutiginissaanut kisermaassisinnaanermik ilaqartumik akuersissutip qinnutiginissaanut innuttaasut suliffeqarfiillu soqutiginnittut qaaqquneqarput.

Sisimiut avannaata tungaani Aqqutikitsup aamma Ungalliup Qaqqaanni Nunamik immikkut atuisinnaanermut Kommunip pilersaarusiorfigineqarnerani tapiliussaq nr. 55-ikkut (kommunip pilersaarutaanut tapiliut) sumiiffinnut akuersissuteqarfiusussanut Qeqqata Kommunia sumiiffinnik atugassiassanngortitsisimavoq. Kommunip pilersaarutaanut tapiliut tassaavoq Qeqqata Kommunianut 2012-2014-imut Kommunip pilersaarutigisaanut tapiliut.

Neqerooruteqartitsinermi matumani qinnuteqaatit Inuussutissarsiornermut, Nukissiuuteqarnermut Ilisimatusarnermullu Naalakkersuisoqarfiup (Naalakkersuisoqarfik) kingusinnerpaamik tallimanngorneq ulloq 12. juli 2019-imi, nal. 23.59 Nuummi, Kalaallit Nunaanni najukkami nalunaaquttami tigusimassavai.

Akuersissummut sumiiffinnik atugassiineq takornariartitsinermik suliassaqarfimmut Naalakkersuisut periusissiaannut ilaatitatut isigineqassaaq, taanna nunatsinni takornariartitsinermik inuutissarsiorfimmi namminersuutigisatut aningaasaliinernik annertusaanissamik, taamaalillunilu piffissamut ungasinnerusumut siuarsarnermik suliffeqartitsinermillu annertusaanissamik siunertaqarluni.

Qaaqqusissutitut allakkanut ilanngussanullu apeqqutit e-mailikkut Inuussutissarsiornermut, Nukissiuuteqarnermut Ilisimatusarnermullu Naalakkersuisoqarfimmut ulloq 30. juni 2019 tikitsinnagu saaffiginnissutaassapput, uunga: isiin@nanoq.gl

Apeqqutit tiguneqartut tamaasa, taakkununngalu akissutaasut kinaanermik ilisarnarunnaarsarlugit Naalakkersuisut nittartagaatigut tamanut saqqummiunneqarumaarput.

Neqerooruteqartitsineq, aamma neqerooruteqartitsinermut atortussiani takornariartitsinermik akuersissummut atugassarisat pillugit erseqqinnerusumik misissuigit, taakkunaniippullu ukuusut:

  1. Qaaqqusissutitut allakkiaq
  2. Takornariartitsinermik akuersissuteqarnissaq pillugu qinnuteqaammut immersugassaq
  3. Ataatsimoorussatut sinniisoq pisussaaffiillu pillugit nalunaaruteqarnissamut iluserititaq
  4. Sisimiut avannaata tungaani Aqqutikitsup aamma Ungalliup Qaqqaanni Nunamik immikkut atuisinnaanermut Kommunip pilersaarusiorfigineqarnerani tapiliussaq nr. 55