Ujaruk

Aatsitassanik avammut annissuineq – Qinnuteqarneq

Ujaqqanik imaluunniit aatsitassanik Kalaallit Nunaanniit avammut annissuinissannik kissaateqaruit, tamanna pillugu maleruagassat eqqumaffigisariaqarpatit.

Avammut annissinissamut akuersissut pisariaqartissanngilat:

  • ujarak imaluunniit aatsitassat Kalaallit Nunaanni pisiarisimagukkit aammalu pisisimanerit assersuutigalugu allagartalerneqarneratigut imaluunniit akiligassap allagartaatigut uppernarsarsinnaasimagukku
  • ujarak anninniakkat assattut ataatsitut annertussuseqarpat

Aatsitassanik nalituunik annissuinissat inerteqqutaavoq. Aatsitassat nalituut nalinginnaasumik tassaasarput ujaqqat erlinnartut. Nalornisimaguit Aatsitassanut Ikummatissanullu Pisortaqarfik attaveqarfigisinnaavat. Aatsitassat nalituut avammut anninneqassappata tamatumani avammut annissinissamut akuersissummik peqarnissaq pisariaqarpoq.

Ujaqqanik imaluunniit aatsitassanik allanut atatillugu Kalaallit Nunaanniit avammut annissinissamik kissaateqaruit, avammut annissinissamut akuersissut pisariaqartittussaavat.


Qinnuteqarneq
Nassiussinerit ataasiakkaat avammut annisissallugit kissaatigisatit tamaasa, avammut annissinissamut akuersissummik qinnuteqarfigisussaavatit. Qinnuteqaammi erseqqinnerusumik nassuiassavat ujaqqat imaluunniit aatsitassat avammut anninnissaannut akuersissummik pissarsivigerusutatit suunersut.

Avammut annissinissamut akuersissummik qinnuteqaat (Immersuiffissaq taamaallaat dansk-isut allassimavoq)

Qinnuteqaatip imarissavai:

1. Atit, najukkat, oqarasuaativit normua aamma e-mail
2. Aatsitassat ataasiakkaat nassuiarneqarnerat (suussusaat malillugu agguataarlugit)
3. Paasissutissat makkua aatsitassanut ataasiakkaanut tunngassuteqartut (suussusaat malillugu agguataarlugit):
a. Aatsitassat suussusaat (assersuutigalugu aatsitassap suunera)
b. Aatsitassat qanoq suliarineqarsimassusaat (assersuutigalugu suliarineqanngitsut imaluunniit suliarineqarsimasut)
c. Aatsitassanut nioqqutissap nalunaaqutsernerata normua. Ujaqqanut suliarineqanngitsunut, ujaqqanut pinnersaasiassanut suliarineqanngitsunut aamma ujaqqanut ukkusissanut suliarineqanngitsunut nioqqutissap nalunaaqutsernerata normua 2530.90.98.0 aamma ujaqqanut suliarineqarsimasunut normua 9602.00.00.0 allassavatit
d. Aatsitassat pitsaassusaat
e. Aatsitassat annertussusaat. Aallaaviatigut pooqartinnagit oqimaassusaat allassavat. Annertussusaata allatut allanneqarnera assersuutigalugu tassaasinnaavoq pooqarnani imaqqortussusaa imaluunniit ujaqqap pinnersaasiassap karaatia
f. Aatsitassat nalingat. Nalinga sapinngisamik pisuni ataasiakkaani eqqoqqissaartumik ilumooqqissaartumillu allassavat. Aatsitassanut Ikummatissanullu Pisortaqarfiup avammut annissinissamut akuersissummik tunniussinermini atugassarititaasussatut aalajangersinnaavaa, nalinga aalajangersimasumik iluseqartillugu allassagit imaluunniit nalinga aalajangersimasumik ilusilimmik aalajangersarneqassasoq imaluunniit uppernarsarneqassasoq (assersuutigalugu avataaneersumit immikkut ilisimasalimmit arlaannaannulluunniit attuumassuteqanngitsumit nalinga nalilertillugu allaganngorlugu piniarneqassasoq)
g. Aatsitassat suussusaannut paasissutissaasinnaasut. Taakkua aatsaat ilisimatitsissutigineqassapput Aatsitassanut Ikummatissanullu Pisortaqarfiup avammut annissinissamut akuersissummut atugassarititaasussatut aalajangersimappagu, suussusaannut paasissutissat allanneqassasut imaluunniit suussusaat paasiniarniarlugu iliuuseqartoqassasoq. Aatsitassanut Ikummatissanullu Pisortaqarfiup aalajangersinnaavaa, tunisassiat aalajangersimasumik ilusilimmik suussusersineqarsinnaassasut, assersuutigalugu tunisassiat nassuiarnerisigut imaluunniit assilinerisigut. Tamatuma saniatigut Aatsitassanut Ikummatissanullu pisortaqarfiup aalajangersinnaavaa, tunisassiat (aatsitassat) akuersissummi pineqartunut ilaasut paatsoorneqarsinnaanngitsumik suussusersineqarsinnaanissaat aammalu tunisassianik allanik (aatsitassanik) akuliunneqarsinnaannginnissaat imaluunniit paarlaanneqarsinnaannginnissaat isumagissagit aammalu ­– avammut annissinerup ingerlanneqareernissaata tungaanut – iliuusissat tamatuminnga tamakkiisumik qulakkeerisussat attatiinnarneqarnissaat isumagissallugu. Suliaqarnikkut tamanna pisut ilaanni pisinnaavoq assersuutigalugu aatsitassat pooritinneqartuni imaluunniit container-ini immikkut nalunaaqutsersukkani, paarnaarsimasuni ammarneqarsinnaanngitsunilu inissisimatillugit assartorlugillu
4. Assilisat qalipaatillit pitsaasumik pitsaassusillit, assigiinngitsunit pingasunit sammiveqartunit assilisaasut aammalu aatsitassanut ataasiakkaanut uuttuutitaqartut
5. Sumiiffik katersiviusoq imaluunniit piiaaviusoq pillugu paasissutissat: Sumiiffianut sumiiffimmullu nunap assinga, sumiiffiata nunap assingani sumiiffianut naleqqat allanneqassapput aammalu sumiiffianut sumiiffimmullu assilisat qalipaatillit pitsaasumik pitsaassusillit ilanngunneqassallutik
6. Illit nammineerlutit (namminersorlutit) aatsitassat ataasiakkaat katersorsimanngikkukkit imaluunniit piiarsimanngikkukkit, inuup imaluunniit inuit aatsitassanik ataasiakkaanik katersisimasut imaluunniit piiaasimasut imaluunniit tamatumunnga peqataasimasut aqqi najugaallu
7. Illit nammineerlutit (namminersorlutit) aatsitassat suliareqqissimanngikkukkit: Inuup imaluunniit inuit aatsitassanik ataasiakkaanik suliareqqiisimasut imaluunniit tamatumunnga peqataasimasut aqqi najugaallu
8. Aatsitassanik ataasiakkaanik pisisup aqqa najugaalu. Aatsitassat avammut annissinermut atatillugu tunineqarsimanngippata, tamatumunnga taarsiullugu aatsitassanik ataasiakkaanik tigusisup aqqa najugaalu ilisimatitsissutigissavat

Aatsitassanut Ikummatissanullu Pisortaqarfiup naleqquttutut nalileruniuk, qinnuteqarnissamut piumasaqaatinik matuma siuliani allassimasunik saneqqutsinissamik Aatsitassanut Ikummatissanullu Pisortaqarfik immikkut akuersissuteqarsinnaavoq.

Qinnuteqaat mail-ikkut imaluunniit allakkatigut Aatsitassanut Ikummatissanullu Pisortaqarfimmut nassiutissavat.

Aatsitassanut Ikummatissanullu Pisortaqarfiup qinnuteqaatit tiguguniuk, Aatsitassanut Ikummatissanullu Pisortaqarfiup qinnuteqaatit suliarissavaa. Tamatuma kingorna Aatsitassanut Ikummatissanullu Pisortaqarfiup avammut annissinissamut akuersissut ilinnut tunniutissavaa. Akuersissut taamaallaat ujaqqanut imaluunniit aatsitassanut tassani allassimasunut aammalu nassiussinermut ataasiinnarmut atuutissaaq. Tamanna isumaqarpoq nutaamik nassiussillutit avammut annissinissamik kissaateqaruit avammut annissinissamut akuersissummik nutaamik qinnuteqarnissat eqqaamasariaqarit.