Ujaruk

Killeqarfimmi nakkutilliineq

Aalisakkanik nioqqutissat, uillut ilaalu ilanngullugit aamma sinnikunik tunisassiat iluanni niueqatigiinneq pillugu Namminersorlutik Oqartussat aamma EU upernaaq 2014-imi isumaqatigiissuteqarput.
Isumaqatigiissut Namminersorlutik Oqartussat suleqatigeqqissaarlugit Danmarkimi Fødevarestyrelsemit suliarineqarpoq

Nioqqutissat, niueqatigiinnissamut isumaqatigiissummut ilaasut, tassaapput aalisakkat aamma aalisakkanit tunisassiat nerisassiat. Tassa imaappoq raajat, aalisakkat, uiluiit, kiisalu taakku sinnikuinit tunisassiat taakkuninngaanniillu tunisassiat.

Maleruagassat sukumiinerusut atuarsinnaavatit UANI.

Allannguinerup kingunerisaanik aalisakkanik nioqqutissiat Kalaallit Nunaanni suliffeqarfinnit tunisassiarineqartut, EU-mut avammut nioqqutigineqarpata Danmarkimi killeqarfimmi uumasut nakorsaanit nakkutigineqarunnaassapput.

Isumaqatigiissut aamma aalisakkanut tunisassianut, aalisariutinik kalaallinit pigineqanngitsunik Kalaallit Nunaanni tulaassisunut pingaaruteqarpoq. Tamanna isumaqarpoq aalisakkanik nioqqutissiat, isumaqatigiissummut ilaanngitsumiit angallammit pisarineqarsimasut, assersuutigalugu Canadamit imaluunniit Ruslandimit, 5-annit 2014-imiit, Nuummi aamma Sisimiuni inissisimasuni Kalaallit Nunaanni uumasut nakorsaqarnikkut killeqarfimmi nakkutilliivinni, (BIP) akuerineqarsimasuni marlunni killeqarfimmi nakkutigineqartalissapput.

Taakkunani BIP-ni marlunni nunat allamiut aalisariutaasa aalisakkanik tunisassianik Kalaallit Nunaanni tulaakkusutaannik nakkutilliinermik isumaginnittussanik sulisunik atorfinitsitsisoqarsimavoq. Uumasut nakorsaqarnikkut killeqarfimmi nakkutilliivik (BIP) pillugu annerusumik atuarsinnaavutit UANI.

Tracesimi nalunaarsuineq

Nakkutilliinermiipput immikkoortut arlallit, soorlu aalisakkanik nioqqutissiap nerisassatut naleqquttuunera aamma Tracesimi nalunaarsuineq (TRAde Control and Expert System). Suliffeqarfik kissaateqaruni TRACES-imut isersinnaalernissaminut ilanngunneqassaguni tamanna una aqqutigalugu pisinnaavoq  https://webgate.ec.europa.eu/sanco/traces/

Traces tassaavoq nalunaarsugaasivik EU-Kommissionimit aaqqissuunneqarsimasoq uumasunik, uumasunit pisunik tunisassiat ilaannik niueqateqarnermut, uumasunik uumasunillu pisunik tunisassianik eqqussuinermut atatillugu uppernarsaasiorneq allagaateqarnerlu kiisalu paasissutissanik nalunaarsuiffik.

Nalunaarsugaasivik inuussutissat/nioqqutissiassat EU-mut iserneranniit tunisassiortumut anngunnissaannut malinnaasinnaanermut sakkussaq pingaaruteqartoq.

Assersuutigalugu canadamiut aalisariutaat suliareqqitassanik Danmarkimut nassiunneqartussanik qaleralinnik usingiarniarluni Nuummut tikippat killeqarfimmi uumasut nakorsaata taassumalu sulisuisa misissussavaat uppernarsarlugugillu aalisakkat ajoquteqannginnersut.

Aamma qanoq amerlatigisut tulaanneqarnersut nalunaarsorneqassapput. Nalunaarsuineq taanna tamatuma kingorna pisassiissutit eqqortinneqarneranik misissuinissamut aamma eqqortumik akileraarutinik akitsuutinillu akileeqqusinissamut atorneqassaaq.