Ujaruk

Inuussutissanik tuniseqqaartuusartut

Piniartut, aalisartut, nunaatillit naatitsisartullu inuussutissanik tunisassiortartut uumasut nakorsaanit akuerineqarsimasussaapput ungasinnerusorlu eqqarsaatigalugu eqqiluisaarnermik pikkorissarnernut peqataasimassallutik

Nunatsinni tuniniagassat siunertaralugit tunisassiornerlu siunertaralugu tunisassiassanik piareersaaneq.

Pingaarnertut tunisassiorneq tassaasinnaavoq uumasuutinit tunisassiorneq, aalisarneq, aalisakkanik tukertitsiviuteqarneq, naatitanik naatitsineq tunisassiornerlu. Aammattaaq pineqartut tassaasinnaapput immuiaaneq immummillu toqqortarinninneq, manniliortitsineq mannissarnerlu.

Pingaarnertut tunisassiortut tamarmik UNIO-mi nalunaarsorsimassapput. UNIO-mit akueriteqqaartinnak suliniutitit aallarnisassanngilatit.

Inuussutissanik pisisartunut toqqaanartumik tuniniaasinnaatitaanngilatit, taamaallaat kalaalimineerniarfinnut aalisakkanilluunniit tuniniaaniaruit angallatinnit toqqaanartumik tuniniaasinnaatitaavutit. 

Inuussutissarsiutigalugu piniartutut pisavit ilai annikitsukkaarlugit nalunaarsueqqaarnallu pisisartunut toqqaanartumik tuniniaasinnaatitaavutit. Neriniartarfinnut nerisarfinnullu (kantiina) toqqaanartumik tuniniaasinnaavutittaaq. Eqqaamallugu tamanna pillugu immikkut ittunik malittarisassaqarmat. Ilitsersuut takuguk UANI .

Eqqiluisaarneq pillugu suliat ingerlasarneri pitsaasut ilisimasarissavat. Isumaqatigiissutit annertunerusumik atuakkit UANI. 

Pingaarnertut tunisassiortutut qinnuteqaatinut immersugassaq immersoriarlugu nassiullugu akuerineqarnissaa pillugu qinnutigisinnaavat. Qinnuteqarnermut immersugassaq pingaarnertut tunisassiortunut tamanut atuuppoq.

Qinnuteqarnissamut immersugassaq pissarsiarisinnaavat UANI.

Qinnuteqaat immersoriigaq aammalu illit suliavit ingerlasarnerinik pitsaasunik allaaserinninneq, uunga nassiutissapput: 

Kalaallit Nunaanni Uumasunut Nakorsaqarnermut Inuussutissalerinermullu Oqartussaqarfik

Postboks 269

3900 Nuuk

E-mail: uumasut@nanoq.gl

EQQAAMALLUGU!  Tunisassiassanik pisiortulersinnak tuniniaqqitassanillu tuniassiornissaq siunertaralugu tunisassiulersinnak UNIO-mit allakkatigut akuerineqaqqaarsimasussaagavit.

Tiguneqarneraniit ullut suliffiusut 21-it iluani qinnuteqaappit suliarineqarnissaa naatsorsuutigissavat.