Ujaruk

Nammineerluni nakkutilliineq suleriaatsillu pitsaasut

Inuussutissalerinermik suliffeqarfittut pingaarnertullu tunisassiortutut "pitsaasumik suleriaaseqartariaqarpoq" nammineerlunilu nakkutilliinissamut malitassaqartariaqarluni, tassani allassimassallutik qanoq ililluni qulakkeerneqassanersoq malittarisassat malinneqarnissaat aamma eqqiluisaarnerup pitsaasuunissaa

Nammineerluni nakkutilliineq sunaana?

Suliffeqarfippit malittarisassanik malinninnissaanut qanoq aqutsinissannut pilersaaruteqassaatit. Taamaaliorneq nammineerluni nakkutilliinermik taaneqartarpoq, pilersaarullu taamaattoq nammineerluni nakkutilliinermut malitassamik taaneqartarpoq. 

Nammineerluni nakkutilliinermut malitassamiissapput inuussutissanik qanoq suliaqassasutit qanorlu taakku toqqortarisassaneritit. 

Malitassami allassimassapput qanoq illit sulisuillu pitsaanerpaamik qulakkiissagissi ullup suliffiup ingerlanerani arlaannik ajortoqannginnissaa. Aamma qanoq iliussanersusi arlaannik ajortumik pisoqassagaluarpat aamma inuit napparsimalernissaat ilimanarsissagaluarpat.

Suliffeqarfiutivit nioqqutissaativillu qanoq nakkutigineqartarnissaat allassimassallugu pingaaruteqarpoq.

Nammineerluni nakkutilliinermut malitassamut assersuut , inerisarsinnaavat suliffeqarfiutinnullu naleqqussarlugu. Qulakkiissavat illit nammineq nakkutilliinermut malitassat tamatigut nutarterneqartuassammat suliffeqarfimmullu naleqquttuulluni. 

Nammineerluni nakkutilliinermut malitassat pissarsiarisiariuk UANI.

Nammineerlutit nakkutilliinermut malitassat inuussutissaleriffittut akuerineqarnissamik qinnuteqaatinnut ilanngullugu nassiutissavat. Eqqaamajuk nammineerluni nakkutilliinermut malitassaq nutaaq nassiutissagakku suliffeqarfiit allanngortikkukku, soorlu igaffik allanngortillugu, nutaamik piginnittoqalerluni nutaanilluunniit tunisassiulerluni.

UNIO nammineerluni nakkutilliinermut malitassamik nutartikkamik nassitsivigineqaqquppat taassuma nassiunnissaanut pisussaavutit.


"Suleriaatsit pitsaasut" suunuku?

Suliffeqarfinni pingaarnertut tunisassiortutut inuussutissalerisutullu pitsaasumik suleriaaseqartussaavutit.

Suliffeqarfinni pitsaasumik suleriaaseqarnissavit aaqqissuunnissaa illit nammineq aalajangersassavat. Pingaarnerusoq tassaavoq, suliffeqarfippit nioqqutissaativillu malittarisassat malillugit ingerlanneqarnissaasa nakkutiginissaat.

Imaassinnaavoq suliffeqarfiit ilaasa pitsaasumik suleriaaseqarnissartik allaganngorlugu suliarerusussagaat taamaalillutik malittarisassat suut najoqqutarineqarnersut malinnaavigineqarsinnaaqqullugit. Pingaartumik suliffeqarfinni arlalinnik sulisoqartuni tamanna iluaqutaasinnaavoq. Tamannali piumasaqaataanngilaq.

"Suleriaatsit pitsaasut" erseqqinnerusumik atuarsinnaavatit UANI.

UNIO-p piumasaqaatigisinnaavaa uppernarsassagit illit "suleriaatsit pitsaasut" ajornartorsiutiginngikkitit naallu allassimassasut piumasaqaataanngikkaluartoq nassuiarsinnaassavat qanoq ilillutit malittarisassanik malinninnersutit.