Ujaruk

Qimuttut

Kalaallit qimmiat qimuttoq qimuttoqarfinni taamaallaat nassaassaavoq. Qimuttoqarfiit tassaapput sumiiffiit Kalaallit Nunaata kitaani alloriusap sanimukartup 66° avannaatungaaniittut, kiisalu Avanersuaq aamma Tunu tamarmi kujammut Nunap Isua tikillugu, kitaani allorniusap tukimukartup 44° kangiatungaa.

Qulaani qimmeqarfittut taaneqartuni taamaallaat kalaallit qimmiat qimuttoq pigineqarsinnaavoq.  Qimminik sulisitanik innarluutilinnulluunniit ikiortissatut qimmit eqqunnissaannut qinnuteqartoqarsimanngippat akuerisaasoqarsimananilu qimminik kalaallit qimmiunngitsunik eqqussineq inerteqqutaavoq. Tamanna piumasarineqarpoq kalaallit qimmiat qimuttoq qimminit allanik nagguilinnit akuneqannginniassammat kiisalu qimuttut nappaatinut avataaneersunut illersorneqarniassammata.

Qimmit qimuttut kiisalu qimmeqarneq qitsuuteqarnerlu pillugit Inatsisartut inatsisaat nr. 18, 30. oktober 1998-imeersoq atuarsinnaavat UANI.

Uumasunik illersuineq pillugu Inatsisartut inatsisaat nr. 25, 18. december 2003-meersoq atuarsinnaavat UANI.

Qimmit qimuttut kiisalu qimmeqarneq qitsuuteqarnerlu pillugit inatsit aqqutigalugu Kalaallit Nunaanni peqqissunik qimmiuteqarnissaq qitsuuteqarnissarlu qulakkeerneqassaaq kalaallillu qimmii qimuttut illersorneqassallutik kiisalu inuit, uumasut avatangiisillu akornutinngortunut qimmit qitsuillu pilersitaannut illersorneqarlutik.

Inatsimmi pineqarput qimmiutit qitsuutillu suulluunniit, taakku inuussutissarsiutaagaluarpata inuussutissarsiutaanngikkaluarpataluunniit apeqqutaatinnagu. Tamatuma kinguneranik qimmit qimuttut piniarnermut uumasuutitullu atorneqartut inatsimmi aalajangersakkanut aamma ilaatinneqarput.

Nappaammik perlerornermik (rabies) akiuiniarneq pillugu Namminersornerullutik Oqartussat nalunaarutaat nr. 22, 17. september 1997-imeersoq atuarsinnaavat UANI.

Nappaammik perlerornermik inatsit qimminut qitsunnullu tamanut, uumasuutitut, inuussutissarsiutigalugu piniarnermut takornarianilluunniit angallassinermut atorneqarnerat apeqqutaatinnagu, atuuppoq.

Qimmiutillit qitsuutillillu tamarmik inatsisip qulaani allassimasup maleruarnissaanut akisussaaffeqarput. Nakkutilliinissamik piumasaqaat aamma qimminut qeqertani qimmilivinni akuerisaniittunut atuuppoq.

Uumasunut Nakorsaqarfiup Inuussutissalerinermullu Oqartussaaffiup (UNIO) uumasunik illersuineq qimuttunillu qimmiuteqarneq pillugit inatsisit atuuttut maleruarneqarnissaat isumagisarpaat.

Apeqqutissaqaruit Kalaallit Nunaanni Uumasunut Nakorsaqarfik Inuussutissalerinermullu Oqartussaaffik (UNIO) saaffiginnissinnaavutit.

Postboks 269

3900 Nuuk                                       

Oqarasuaat: (+299) 34 50 00

Fax: (+299) 34 63 55

E-mail: uumasut@nanoq.gl