Ujaruk

Aalisarnermik piniarnermillu nakkutilliineq

Aalisarnermik nakkutilliinikkut malittarisassat naalakkersuinermik suliallit kattuffiillu, nunatsinni taamatullu nunani tamalaani aalajangigaat aallaavigalugit aalisartoqartarnissaa, isumannaarneqassaaq

Aalisarnermut tunngatillugu malittarisassatigut piujuartitsinissamik periaaseqarluni aalisartoqartarnissaa aalisagaqatigiillu ataasiakkaat annertuallaanik aalisarneqannginissaannut illersorneqarnissaat, isumannaarneqassaaq.

Kalaallit Nunaanni inuussutissarsiutigalugu aalisartuussagaanni piumasaqaatinik naammassisimasassarpassuaqarpoq. Paasissutissarpassuit pisortanut nassiunneqartartussaapput. Kalaallit Nunaanni Aalisarsinnaanermut Akuersissutinik Nakkutilliisoqarfiup paasissutissat tamakku tamaasa katersugarai. 

Paasissutissat tamakku tamaasa KANUAANA-p tigusartussaammagit pingaaruteqarpoq, tamakku assigiinngitsorpassuarnut atatillugu atorneqartartussaanerat.

Siullertut pingaarnertullu KANUAANA-p paasissutissat nassiunneqartut kilot qassit imaaniit qaqinneqarsimanersut malinnaanerminut atortarpai. Aalisarnerit ilaat malinnaavigeqqissaarneqartussaapput pisassiissutimmi annerpaaffissaligaasarmata. 

Aalisarnermut tunngassuteqartunik Inatsisartunit apeqquteqartoqaraangat KANUAANA-p aammattaaq tamakku akineqarnerinut kisitsisitigut atorneqartussat tunniussuuttarpai. KANUAANA Pinngortitaleriffimmut paasissutissiisarportaaq taakku kisitsisit pisassiissutissanik kaammattuuteqarnermik ilaattut atortarmatigit.

KANUAANA-p pingaarnertut suliassarai nalunaarutigineqartunik angallatillu allattaaviinik ingerlaavartumik nakkutilliineq, Kalaallit Nunaata imartaani qaammataasamik tunngaveqarluni nakkutilleeriaatsikkut sapaatit akunnikkaartumillu nalunaarutigineqartartutigut aalisariutit tamarmik sulerinerinik alapernaarsuineq.

Nalunaarutigineqartunit, angallatit allattaaviinit taamatullu tulaassanit paasissutissat aallaavigalugit pisassiissutinit atukkanut takussutissat suliarineqartarput, kattuffinnut oqartussaasunullu pisariaqartitsisunut ingerlateqqinneqartartut.

KANUAANA-p taamatuttaaq nakkutigissavaa Kalaallit Nunaanni nunanilu tamalaani aalisarnermut aalajangersakkat angallatinit Kalaallit Nunaanni nalunaarsorneqarsimasunit, Kalaallit Nunaata oqartussaaffigisaata avataani aalisartunit malinneqarnissaat. 

Angallatit Kalaallit Nunaanneersut aalisartarput imartani NEAFC-mit NAFO-millu malittarisassaqartitaasuni taamatullu Norgep, Ruslandip, Islandip Savalimmiullu oqartussaaffigisaanni. 

Taamaammat aalisarnermik nakkutilliisoqarfik sulisarpoq soqutigisaqaqatigiiffiit assigiinngitsut suleqatigalugit. Ilaatigut nunanit tamalaanersut suleqatigisartakkat NAFO, NEAFC, NACGF aamma NASCO.

Avataasiorlutik aalisartunik nakkutilliisuuvoq Arktisk Kommando (AKO), avataani angallatit pisaannik aalisarnermullu atortuinik nakkutilliisuusartoq