Ujaruk

Qinnuteqarfissat nutaat qinnuteqarfissallu ulluata killinga

Aalisarnermut, Piniarnermut Nunalerinermullu Naalakkersuisoqarfik avataasiorluni aalisarnissamut, misileraalluni aalisarnissamut aamma aalisarsinnaanermut akuersissutinik allanngortitsinissamut oktobarip 28-annit qinnuteqarfissaqartitsilerpoq.

Inuit ingerlatsiviillu avataani pisassiissutaasimasunik aalisassallutik kissaateqartut  qinnuteqaatertik Aalisarnermut, Piniarnermut Nunalerinermullu Naalakkersuisoqarfimmut nassiutissavaat.

Qinnuteqarnermi immersugassat eqqoqqissaartumik immersorneqassapput, paasissutissallu tamatumunnga attuumassutillit aamma ilanngullugit nassiunneqassallutik, taakku  naalakkersuisoqarfimmi tiguneqarsimaleriarpata sullissineq aallartinneqassaaq. Maluginiagassaavoq immersuinermi aalisagaq sorleq aalisassallugu immersuiffimmut allanneqassammat.

Qinnuteqarfissaq ilitsersuutitaqarpoq, tassani allassimalluni immersuiffissaq qanoq alluttuiffigineqassanersoq.Taakku pillugit apeqqutissaqartoqarpat naalakkersuisoqarfimmut saaffiginnittoqarsinnaavoq.

Aalisarnermut, Piniarnermut Nunalerinermullu Naalakkersuisoqarfimmit malugeqquniarneqarpoq  avataasiorluni aalisarnissamut siunissami qinnuteqartarnermi ulloq kingulleq qinnuteqarfissaq atuutsinneqalermat. Siunissami qinnuteqarfissaq kingulleq tassaasassalluni decembarip aallaqqaataa.

Ulloq qinnuteqarfigineqartoq kingulleq, decembarip aallaqqaataa, tassaavoq qinnuteqaatinut sullissinerup aallartiffia.

Misileraalluni aalisarneq

Qinnuteqaatit atuutilersinneqarnerinut atatillugu misileraalluni aalisarsinnaanermut aamma qinnuteqarfissaq immersuiffittalik atulerpoq.  Qinnuteqartoq tassani immersuissaaq aalisagaq sorleq misileraalluni aalisassanerlugu. Qinneqarfissami immersuinissamut aamma ilitsersuuteqarpoq.

Misileraalluni 2016-imi aalisarfissat suli pilersinneqanngillat, taamaattoq Naalakkersuisoqarfik misileraalluni aalisarusuttut qinnuteqaataannik nassinneqarnissaminut qujarussereerpoq.

Naalakkersuisunit misileraalluni 2016-imi aalisarfigineqartussatut pilersinniarneqartut, taakkulu misileraalluni qaqugu aalisarneqarsinnaanissaat pillugit   kingusinnerusukkut nalunaarutigineqassapput. 

Akuersissummik allanngortitsineq

Sullissineq pisariillisarumallugu naalakkersuisoqarfiullu qinnuteqartunit paasissutissat tigusani qulakkeerluarniarlugit qinnuteqarfissamik  immersuiffittalimmik nutaamik aamma atortitsilerpoq aalisarsinnaanermut akuersissutip atuuttup allanngortinneqarnissaanut immersuiffittalimmik.

Soorlu ingerlatsivimmut aalisariummullu paasissutissat allanngortinneqarsimappata, imaluunniit aalisarsinnaanermut akuersissummi aalisariummik ilanngussisoqassappat, taava qinnuteqarfissaq immersoriarlugu nassiunneqassaaq.

Allaffissornermut aamma sullissinermut pingaaruteqartorujussuuvoq naalakkersuisoqarfiup paasissutissat nutaanerpaat pisimassallugit. Taamaattumik qinnuteqarnermi nutaamik immersuiffissamik atulersitsisoqarpoq. Qinnuteqarfissaq ilitsersuutitaqarpoq, tassani allassimalluni immersuiffissaq qanoq alluttuiffigineqassanersoq. Eqqaamassavat qinnuteqarnermi paasissutissat attuumassutillit ilanngullugit kakkiutissagakkit.

Ingerlatsiviup aalisarsinnaanermut akuersissutini atuuttoq allanngortissallugu kissaatigiguniuk, taava qinnuteqaat immersuiffittalik Aalisarsinnaanermut, Nunalerinermullu Naalakkersuisoqarfimmut nassiutissavaa. 

Uani  avataasiorluni aalisarnermut qinnuteqaat aasinnaavat

Uani  misileraalluni aalisarnermi qinnuteqarfissaq aasinnaavat

Uani  aalisarsinnaanermut akuersissutip allanngorneranut qinnuteqarfissaq aasinnaavat