Ujaruk

Aalisariummit aalisariummut allamut usingiarnissamut akuersissut

Umiarsuarmik tunitsivigineqarsinnaasumik nunatsinneersumik nunanit allameersumilluunniit tunitsiveqartitsiniaruit, aalisariummit aalisariummut allamut usingiarnissamut akuersissuteqaqqaartariaqassaatit

Aalisariummit aalisariummut allamut nuussineq taassaavoq aalisakkanik aalisakkanillu tunisassiarineqarsimasunik imaaniitilluni usingiarneq. Angallatigineqartut aalisariutaasinnaapput, tunitsiviusinnaallutik assartuutaallutilluunniit.

Umiarsuaq tunitsivigineqartoq tassaavoq angallat, umiarsuaq imaaniitilluni aalisakkanik tunitsivigineqartartoq, aalisagaq ilivitsuutillugu ilaannaaluunniit tunisassiarisinnaasarlugu, imaluunniit aalisakkanik tunineqartunik nunami tunitsivimmut assartuisinnaassasoq.

Angallat, umiarsuaq nunatta imartaani aalisakkanik aalisakkanillu tunisassiarineqarsimasunik usilersortinnani, immikkut akuersissummik qinnuteqaqqaassaaq.  

Angallammik, umiarsuarmik piginnittoq aalisakkanik aalisakkanillu tunisassiarineqarsimasunik usilersorneqartoq APNN@nanoq.gl-mut akuersissummik qinnuteqassaaq.

Angallammik, umiarsuarmik piginnittoq, umiarsuaateqarfik, umiarsuarmilluunniit attartortoq aalisakkanik aalisakkanillu tunisassiarineqarsimasunik usilersorniartoq APNN@nanoq.gl-mut qinnuteqassaaq.

Avataani aalisarneq

Angallat, umiarsuaq tunitsivigineqartoq nunani NEAFC-mi imaluunniit NAFO-mi ilaasortaasuni angerlarsimaffeqartuussapput imaluunniit nunani Cooperating Non-Contracting Partytut NEAFC-imit NAFO-miilluunniit akuerineqarsimasuneersuussallutik.

Angallat, umiarsuaq NEAFC-mut NAFO-mulluunniit nalunaarutigineqarsimassaaq naalagaaffiullu erfalasuanik erfalasoqarfigisami pisortaasa  aalisariummit aalisariummut allamut usingiarnissamut akuerisariaqarsimassavaat.

Tamatumani qulakkeerneqassaaq qaammataasat atorlugit aalisariutinik alapernaarsuineq (nakkutiginninneq) pillugu aalajangersakkat malillugit umiarsuup pisariaqartitanik qaammataasanut attaveqaatinik atortulersugaasimanissaa.

Nunat allamiut angallataataannik, umiuarsuaataannik attartorneq

Sinerissap qanittuani aalisarneq

Ugguuna angallammik, umiarsuarmik tunitsiviliiniaruit qinnuteqarsinnaavutit, aalisakkanik sinerissap qanittuani aalisariutinik pisarineqarsimasunik tunitsivigineqarsinnaasumik.

Uani qanoq ilillutit qinnuteqarsinnaanerit pillugu allaaserineqarpoq, aamma uani atuarsinnaavat umiarsuarmik tunitsiviliinermut periutsit 2013-inimeersut. 

Tunitsivimmik aamma umiarsualiisoqartarpoq aalisakkat nunamit umiarsuarmi tunisassiassanngorlugit tunitsiviliisoqaraangat, uku matumani tunaartarineqarlutik:

  • Nunami tunisassiarineqarsimasut qeritinneqartussaatillugit
  • Aalisakkat tunisassiarineqanngitsut assartuunneqartillugit
  • Umiarsuarluunniit tunitsivissanngorlugu sikumi ukiisinneqaraangat, sikkussaatillugu

Umiarsuarmik tunitsiviliisoqarsinnaasarpoq

  • Nunami tunitsivimmik pisariaqartitsivissortoqaraangat imaluunniit tunitsivissaqartitsivissoqartinnagu
  • Aalisarnermi akigitinneqartut pissusissaasut siuarsaqqullugit

Umiarsuarmik tunitsiviliineq nunami nammineerluni suliffissualiortitsiniarnermut pilersaarutigineqartunut kinguarsaataassanngilaq.

Aalisakkat tunineqareersimappata, tamanna aalisakkanik angallassinertut isigineqassaaq,  aalisariummit aalisariummut allamut usingiarnertut akuersissuteqarnissamik pisariaqartitsisoqarani.

Aalisarnermut, Piniarnermut Nunalerinermullu Naalakkersuisoqarfimmut attaviginnillutit paasissutissanik amerlanerusunik piniarsinnaavutit imaluunniit uunga apnn@nanoq.gl allallutit apeqquteqarsinnaavutit.

Umiarsuaateqarfiup tunitsiviliiniartup umiarsuup tunitsiviusussap uppernarsaataanik ukununnga qinnuteqarnermini nassiussissaaq:

1.  Umiarsuup suminngaanneernerata uppernarsaatai;

2. Umiarsuup usitussutsimut uuttuutaanut uppernarsaatit;

3. Naalagaaffiup erfalasoqarfigisaata aalisariummit aalisariummut allamut usingiarnissamut akuersissutaata assilineqarnera. (piginnaatitsissut)

4. Umiarsuup  qaammataasat atorlugit aalisariutinik alapernaarsuineq (nakkutiginninneq) pillugu aalajangersakkat malillugit umiarsuup pisariaqartitanik qaammataasanut attaveqaatinik atorsinnaasunik atortulersugaasimaneranik naalagaaffiup erfalasoqarfigisaata uppernarsaatai, taakkulu KANUAANA-mut nassiunneqarsinnaaneri.

Aalisakkanik tunitsivigineqartup usingiarfigineqartullu Kalaallit Nunanni maleruaqqusat malissavaat.

Umiarsuarmit Kalaallit Nunaanni Aalisarsinnaanermut Nakkutilliisoqarfimmut attaveqatigiinnermi oqaatsit atorneqartut tassaapput kalaallisut, danskisut tuluttullu.

Umiarsuaq Namminersornerullutik Oqartussat nalunaarutaat nr. 21 maajip 30-anneersoq 2001 naapertorlugu qaammataasat atorlugit aalisariutinik alapernaarsuineq (nakkutiginninneq) pillugu aalajangersakkat malillugit, umiarsuup qaammataasanut attaveqaatinik atorsinnaasunik atortulersugaasimassaaq.

Umiarsuaq tunitsiviusup usilersukkani pillugit gflk@nanoq.gl-mut nalunaarutigisassavai.