Ujaruk

Tuttut

Tuttut nujuartat Kalaallit Nunaanni tamarmi eqqissisimatitaapput. Nunap immikkoortuisa ilaanni tuttunniarneq pisassiissuteqarnikkut killilersugaavoq, nunallu immikkoortuini allani pisassiinikkut killilersuisoqarani

Tuttu piniarsinnaavat neqaa, amia nassuilu pillugit. Ukiumoortumik pisassiissutit nunap immikkoortuinut ataasiakkaanut agguataarneri, kiisalu piffissat piniarfiusut sumilu piniarsinnaanersutit nittartakkami www.naalakkersuisut.gl-imi paasiniarsinnaavat.

Kalaallit Nunaanni tuttunut piniarfiit 11-upput.

  • Nunap immikkoortua 1: Naternaq
  • Nunap immikkoortua 2: Sisimiut-Kangerlussuaq
  • Nunap immikkoortua 3: Akia-Maniitsoq
  • Nunap immikkoortua 4: Ameralik
  • Nunap immikkoortua 5: Qeqertarsuatsiaat
  • Nunap immikkoortua 6: Qassit
  • Nunap immikkoortua 7: Neria
  • Nunap immikkoortua 8: Nuussuaq
  • Nunap immikkoortua 9: Kangerluarsorujuk
  • Nunap immikkoortua 10: Inglefield Land aamma Prudhoe Land
  • Nunap immikkoortua 11: Ivittuut

Tuttunniarusukkuit, makkua pigisariaqarpatit

  • Piniarnermut allagartaq atuuttoq
  • Tuttunniarnissamut akuersissut nunap immikkoortuanut pineqartumut atuuttoq
  • Sakkut piniutit atorneqartussaatitaasut, nalunaarummi taaneqartut

Aallaasit minnerpaamik .222-tut sulloqqortussuseqassaaq, aamma aallaat nakersarneqarsimassaaq paarilluagaallunilu. Qoorortuut imassaat nammineq toqqarsinnaavatit. Qoorortuut eqiinnartakkat eqikkaannartakkallu tuttunniarnermi atorneqarnissaat inerteqqutaapput.

Pisisseq atorlugu tuttunniassaguit pisisseq Compoundiussaaq aaqqinneqarsinnaasumillu umerfeqassaaq / nalunaaqutaasaqassaaq. Qarsut aalajangersimasut atorneqartillugit (qarsup naqqua minnerpaamik 25 gramminik oqimaassusilik), nusutsisinnaassusaa minnerpaamik 21 kiilumik nusutsisinnaassaaq.

Qarsut aalajangersimasut atorneqartillugit (qarsup naqqua minnerpaamik 28 gramminik oqimaassusilik), pisissip nusutsisinnaassusia minnerpaamik 25 kiilumik nusutsisinnaassaaq.

Piniarnermi tuttup pisarineqartup neqaa tamaat nassarneqassaaq.

Tuttumik pissataqaraluaruit pisussaatitaavutit sapinngisamik piaarnerpaamik taassuminnga toqutsinissat aamma tuttumik pissataqaraluaruit  takunnikkuit ajornanngippat toqunnissaanik pisussaaffeqarputit, kiisalu APNN-imut imaluunniit piniarnermut aalisarnermullu nakkutilliisumut qanoq pisoqarsimaneranik nalunaarutigalugu.

Assartuutit taamaallaat atorsinnaavatit aqqutit aalajangersimasut akuerisaasut (korridorit) kommunalbestyrelsimit aalajangersarneqarsimasut aqqutigalugit. Kisianni assartuutit tuttunik piniarnermi malersuinermi ungoorinermiluunniit atorsinnaatitaanngilatit. Assartuutinik nunami ingerlaartillutit minnerpaamik 500 meterinik ungasissuseqarlutit tuttut uumasut qanillineqaqqusaapput.

Sumiiffinni qimminik qimuttoqarfiusuni qimussit assartuutitut atorsinnaavatit.

Piniarnerup naammassineranit pisatit kommunimut nalunaarutigissavatit kingusinnerpaamik ullut 14-it qaangiutsinnagit, immikkut ittumik nalunaartussaatitaanermi immersugassaq atorlugu, taanna tuttunniarnissamut akuersissutip tunuani naqinneqarsimavoq.

Uani sukumiinerusumik atuarsinnaavat tuttut kigutaasigut utoqqaassusersineqartarnerat. Uani

Kingusinnerpaamik oktobarip 15-iat qaangiutsinnagu tuttutatit imaluunniit pissatatit tamaasa APNN-imut nalunaarutigissavatit, PINIARNEQ-mi ukiumoortumik immersuiffissaq atorlugu.

”Kalaalimineerniarfinni” tunisineq aamma tuniniaanissaq taamaallaat piffissami piniarfiusumi aamma piffissap piniarfiusup qaangiunneranit amerlanerpaamik ulluni pingasuni atuuppoq. Kommunerisanni tuttunniarneq pillugu kommuni immikkut ileqqoreqqusaqarpat pisussaaffeqarputit tuttunniartinnak tamakku paasisimassallugit.