Ujaruk

Terianniat ukallillu

Terianniat ukallillu Kalaallit Nunaanni siammarsimapput. Terianniat ukallillu Kalaallit Nunaanni killilersugaanngillat (pisassiisutaasanngillat). Ukiup annersaani terianniarniarlutillu ukalerniarsinnaavutit, aasakkulli eqqissisimatitaasarput piaqqiornerisa nalaanni illersorniarlugit

Terianniaq

Terianniaq Kalaallit Nunaanni siammarsimavoq, assigiinngitsullu marluupput - qernertaq (blåræven) qaqortarlu (hvidræven).

Teriarniarniassaguit piniarsinnaanermut allagartaqassaatit atuuttumik aamma Kalaallit Nunaanni najugaqartutut inuit nalunaarsorsimaffianni nalunaarsorsimassaatit.

Terianniarniarsinnaavutit septembarip 16-iniannit maajip 14-iniannut.

Timmiarsiummik, qoorortuuaraqqamik aamma qoorortuumik nalinginnaasumik piniarsinnaavutit. Qoorortuut eqittaannartakkat nutsuinnartakkallu atussanngilatit.

Taamaallaat atortut/sakkut ingerlaannartumik toqutsissutaasinnaasutut suliarineqarsimasut atortassavatit.  Teriannianut pullatit inississavatit aamma isumagissavat narajaliussat timmissanit tigutsisilinnit tiguneqassanngimmat.

Piniarnermi atortut piffissap eqqissisimatitsiviup nalaani tassalu maajip 15-iniannit septembarip 16-iniannut, atoriaannaannginnissaat isumagissavat.

Qamutinik motoorilinnik, soorlu snescooterinik terianniarnermi atuissanngilatit.

Eqqumaffigissavat kommuni najugaqarfigisat, terianniarnermut tunngasunik kommunimi ileqqoreqqusanik pissutsinut taakkununngarpiaq tunngassuteqartunik atuutilersitsisimasinnaammat.

Eqqumaffigissavat kommunalbestyrelsip aamma nunap immikkoortortaani nakorsaanerup inassuteqarnerisa kingorna kommunimi imaluunniit sumiiffimmi aqutsiviusumi piffissaq eqqissisimatitsiviusoq, Naalakkersuisut atorunnaarsissinnaammassuk.

Terianniat ilaanneeriarlutik perlerornermik tunillanneqarsimasarput. Tamatigut terianniat napparsimanerat takuneqarsinnaaneq ajorpoq – inunnut nujuassusertik tamatigut pigiunnaartarpaat aamma illoqarfinnut nunaqarfinnullu qanillinerulersarlutik.

Amerlanertigut qitsuutit qimmiutilluunniit kiitinnermi kingunerisaanik tunillanneqarsinnaavoq aamma uumasuutivit qujagisavit tamatuma kingorna kiillutit tunillassinnaavaatit. Nalorniguit uumasunut nakosaqarfik inuussutissalerinermullu oqartussaaffik attavigisinnaavat uani.

Ukaleq

Ukaleq Kitaani, Avannaani aamma Nunatta Tunuata Avannaani qaqqani, qatsinnersani aamma masarsoqarfinni uumasuuvoq. Inuit najugaqarfiinut qanilligajuttuunngilaq. Taamaattoq Nunatta Tunuata Kujataani ukaleqanngilaq ukiuunerani silap unerisimanngittarnerujussua pissutigalugu.

Ukalerniarsinnaajumallutit piniarsinnaanermut allagartamik atuuttumik peqassaatit aamma Kalaallit Nunaanni aalajangersimasumik angerlarsimaffeqartuussaatit.

Aggustip aallaqqaataanit apriilip 30-annut ukalerniarsinnaavutit.

Timmiarsiummik, qoorortuuaraqqamik aamma qoorortuumik nalinginnaasumik piniarsinnaavutit. Qoorortuunik eqittaannartakkanik nutsuinnartakkanillu atuisanngilatit.

Qamutinik motoorilinnik, soorlu snescooterimik angallateqarlutit ukalerniassanngilatit.

Eqqumaffigissavat ukalerniarnermut tunngatillugu sumiiffimmi najukkami pissutsinut tunngasunik atuuttulersimasunik kommunimi ileqqoreqqusaqarsinnaammat.