Ujaruk

Umimmak

Umimmak Kalaallit Nunanni eqqissisimatitaavoq. Umimmanniarsinnaaneq nunap immikkoortuisa ilaanni pisassiisarnerit aqqutigalugit killilersugaavoq, nunallu immikkoortuisa ilaanni pisassiisoqarneq ajorluni

Umimmaap neqaa, qiviui nassuilu iluaqutiginiarlugit sumi umimmanniarsinnaanerlutit paasiniarlugu nunap immikkoortukkaartumik ukiumoortumik pisassiissutit agguataarsimaneri qaqugukkullu piniartoqarsinnaanera www.naalakkersuisut.gl -imi atuarsinnaavatit.

Kalaallit Nunaanni umimmanniarfissat nunap immikkoortuinut 8-nut agguagaapput

  • Avannarliit
  • Kangaarsuk
  • Sigguk
  • Naternaq
  • Sisimiut
  • Maniitsoq
  • Ivittuut
  • Ittoqqortoormiit

Umimmanniarsinnaassaguit

  • Piniarsinnaanermut akuerisamik allagartaqaqqaartariaqarputit
  • Nunap immikkoortuini aalajangersimasumi umimmanniarsinnaanissamut allagartat
  • Piniutit nalunaarummi nalunaarsorneqarsimasut pigeriissagitit.

Qoorortuut piniarnissamut atorneqarsinnaatitaasut sullukinnersaat 6,5 x 55 kaliberiuvoq, aallaallu nakersarneqarsimassaaq pitsaasuussallunilu. Qoorortuut eqittaannartakkat nutsuinnartakkallu atorneqarnissaat inerteqqutaavoq.   

Pisisseq atorlugu piniarniaruit, pisisseq katitigaassaaq (nutaaliaasunik) pisisserlu aaqqinneqarsinnaasumik umerfeqassaaq/nalunaaqqutaqassaaq 28 kiilunillu nusutsisinnaassuseqarluni. Qarsuisalu nuui aalajangersimasuussallutik minnerpaamik 34 grammiinik oqimaassusillit.

Umimmaap pisarineqartup neqaa tamaat pisaqarfimmiit nassassavat.

Umimmammik pissataqaruit, pisussaavutit sapinngisamik piaarnerpaamik toqussallugu, umimmammillu pissatamik naammattuugaqaruit pisussaavutit toqqussallugu pisorlu pillugu APNN-imut imaluunniit Piniarnermut Aalisarnermullu Nakkutilliisumut nalunaaruteqarlutit.

Aqqutit assartuiffissatut akuerisaasut kommunalbestyrelsimit aalajangersarneqarsimasut kisiisa aqqutigalugit pisavit assartornissaanut assartuutinik atuisinnaavutit, taamaattorli piniarnermut ungusinernullu atatillugu assartuutinik atuisinnaatitaanngilatit.

Assartuutinik atuitillutit umimmannit uummasunit minnerpaamik 500 meterinik ungasissuseqarlutit ingerlaartassaatit.

Snescooterit, ATV-it helikopteriluunniit atorlugit umimmannik ungoorinissamut immikkut akuerineqarnissamik qinnuteqarsinnaavutit peqataasussat, ungooriffissatut piffissap aammalu tamassuma sumi ingerlanneqarnissaata nalunaarutigineratigut. Allakkatigut qinnuteqaat APNN-imut nassiunneqassaaq.

Qimmeqarfinni qimussit assartuutitut atorneqarsinnaapput.

Pisanik nalunaaruteqarnermi immersuiffissaq umimmanniarnissamut akuersissutip tunuaniittoq atorlugu umimmaat pisatit kommunimut nalunaarutigissavatit piniarnerup naammassinerata kingorna ullut 14-it qaangiutsinnagit. 

Umimmannik pisat aamma pissatat tamarmik PINIARNEQ-mi ukiumoortumik immersuiffissaq atorlugu APNN-imut nalunaarutigineqassapput kingusinnerpaamik oktobarip 15-iniat nallertinnagu.

”Kalaalimineerniarfinni” umimmannik tunisillutillu tuniniaasinnaavutit tuniniaasinnaanerlu taamaallaat piffissani piniarfiusuni aamma piffissap piniarfiusup qaangiunneranit amerlanerpaamik ulluni pingasuni atuuppoq. 

Kommunigisanni umimmanniarneq pillugu kommuni immikkut ileqqoreqqusaqarpat, pisussaavutit umimmannialersinnak taakku ilisimassallugit.