Ujaruk

Inuussutissarsiutigalugu piniartutut allagartaq

Inuussutissarsiutigalugu piniartutut allagartat atorlugu illit kommuninni piniarnermut allagartamik qinnuteqarsinnaavutit. Uumasunik pisassiissutigineqartunik, soorlu umimmannik, tuttunik, nannunik, arfernik kapisilinnillu piniarnermut allagartap pisaqarsinnaatippaatit

Inuussutissarsiutigalugu piniartutut allagartap pisannik tamakkiisumik ilaannakuusumilluunniit tunisisinnaatippaatit. Aamma timmissanik.

Piniarnermut allagartaq illit kisivit atorsinnaavat. Piniarnermut allagartaq aallaaniartinnak akilissavat. Piniarnermik aalisarnermillu nakkutilliisup uppernarsaanissat piumasarissappagu, allagartaq akiliisimanermillu uppernarsaat nassatarissallugu pisussaaffigaat.

Uppernarsaatip malitsigisaanik pisatit nalunaarutigissallugit pisussaaffigaat. Inuussutissarsiutigalugu piniartumut ukiumoortumik immersugassaq aasinnavat uani  taavalu piniarnermik atuagassiami Piniarneq-mi itinerusumik nassuiaataa atuarlugu. Aamma www.nunagis.gl atorlugu qaqugukkut piniarfissat takusinnaavatit.

Inuussutissarsiutigalugu piniartutut allagartartaarnissamut piumasaqaatit makku naammassissavatit:

  • Qinnuteqarnerup nalaani 12-nik ukioqalereersimassaatit
  • Ukiut kingulliit marluk Kalaallit Nunaanni nalunaarsugaasutut najugaqassaatit
  • Ukiut kingulliit marluk Kalaallit Nunaanni akileraartussaasimassaatit
  • Ilanngaasernagit isertitavit katinnerisa aallaaviani minnerpaamik 50 procentii piniarnermik, aallaaniarnermik aalisarnermilluunniit tunngaveqassapput. Maleruagassamit uuminnga immikkut akuerineqarnissaq qinnutigisinnaavat, assersuutigalugu inuussutissarsiutigalugu piniartutut allagartaq siullermeersumik qinnutigigukku. 
  • Akiliuteqarluni piniariarnermit isertitat ilanngullugit naatsorsorneqassapput. Ilisimasassarsiornermik suliniutinit aamma takornarianik suliaqarnermit isertitat kiisalu qinikkatut pisortanillu toqqakkatut suliaqarnermit aamma inuussutissarsiutigalugu piniartut kattuffiini peqatigiiffiinilu siulersuisutut suliaqarnermit akissarsiat ilanngullugit naatsorsorneqassanngillat.

Isumaginninnermik sullissiviit, isumaginninnermik perorsaanermillu suliaminni piniarnermik aallaaniarnermillu periutsimik atuisut, inuussutissarsiutigalugu piniartutut allagartamik aamma qinnuteqarsinnaapput.

Piniarnermut inatsisit piaaralutit arlaleriarlutilluunniit unioqqutikkukkit piniarnermut allagartat annaasinnaavat. Aamma piniarnermut allagartat annaasinnaavat, piniarnerup nalaani inummut allanut peqqarniitsumik akisussaaffeqanngitsutut iliuuseqaruit imaluunniit inummik allamik innarliiguit.

Inuussutissarsiutigalugu piniartutut allagartaq 200 koruuninik akeqarpoq. Inuussutissarsiutigalugu piniartutut allagartaq girokorti akilerukku aatsaat atuutilissaaq.

Internettikkut Pisanik Nalunaaruteqartarneq aqqutigalugu inuussutissarsiutigalugu piniartutut allagartamik, inuussutissarsiutigalugu piniartutut allagartavit nutarternissaanik imaluunniit inuussutissarsiutigalugu piniartutut allagartat sunngiffimmi piniarsinnaanermut allagartanngortinniarlugu qinnuteqarsinnaavutit.

Imatut iliussaatit:

  • Ukiup siuliani pisatit nalunaarutigikkit taavalu ukiumut tulliuttumut inuussutissarsiutigalugu piniartutut allagartat nutarterlugu
  • Piniarnermut allagartat ukiup siulianeersuuppat nutaannginneruppalluunniit inuussutissarsiutigalugu piniartutut allagartamik nutaamik qinnuteqarit

Imminut sullissivik atorsinnaaniarlugu NemID-mik peqassaatit. NemID aningaaserivimmi atortakkat atorsinnaavat.

Internettikkut piumasaqaatinit immikkut akuersissummik qinnuteqarsinnaanngilatit. Immikkut akuersissummik qinnuteqarniaruit kommuni najugaqarfigisat saaffigissavat.

Piniarnermut allagartat nutarterniarukku pisatit nalunaarutigeqqaassavatit.

Inuussutissarsiutigalugu piniartutut allagartaq sunngiffimmi piniarsinnaanermut allagartamut taarsertinniarukku imatut iliussaatit:

  1. Pisanik Nalunaaruteqartarneq aqqutigalugu pisatit nalunaarutigissavatit kiisalu nutarterineq aamma inuussutissarsiutigalugu piniartutut allagartamik nutaamik qinnuteqarlutit. Pingaartoq, inuussutissarsiutigalugu piniartutut allagartavit nutaanngortinnissaa qinnutigissanngilat.
  2. Tamatuma kingorna imminut sullissinnaanermut aaqqissugaq Sunngiffimmi piniarsinnaanermut Allagartaq Pisanik Nalunaaruteqartarneq aqqutigalugu sunngiffimmi piniarsinnaanermut allagartamik nutaamik qinnuteqassaatit kiisalu nutaanngortitsinissamik aammalu sunngiffimmi piniarsinnaanermut allagartamik nutaamik qinnuteqarsinnaallutit.

Inuussutissarsiutigalugu piniarnermut allagartamik qinnuteqaat

Sunngiffimmi piniarnermut allagartamik qinnuteqaat

NemID-mik peqanngikkuit qinnuteqarnermi immersugassaq immersorsinnaavat innuttaasunik sullissisarfimmi imaluunniit nunaqarfimmi kommunip allaffiani stempelerneqartussaq akuerineqartussarlu. 

Paasissutissiutatit kommunimit misissorneqareerpata qinnuteqaat taakku piniartut aalisartullu peqatigiiffiannut tusarniaassutigissavaat. Qinnuteqaatit Aalisarnermut, Piniarnermut Nunalerinermullu Nalakkersuisoqarfimmut ingerlateqqinneqareerpoq.

Inuussutissarsiutigalugu piniartutut allagartamik qinnuteqarnermi immersugassaq

Pisavit nalunaarsuutaat jagtbeviser@nanoq.gl-imut nassiussinnaavat aammalu piniarnermut allagartat nutarterlugu imaluunniit faxiutigalugu (+299) 34 53 40 atorlugu imaluunniit allakkatigut uunga nassiullugit

Aalisarnermut, Piniarnermut Nunalerinermullu Naalakkersuisoqarfik (APNN), Postboks 269, 3900 Nuuk

Ukiumoortumik immersugassaq nassiutinngikkukku taamaalillutillu pisatit nalunaarutiginngikkukkit piniarnermut allagartat nutartertissinnaanngikkit eqqumaffigissavat.

 Siorna oktobarip aallaqqaataanit ukioq manna septembarip 30-ata tungaanut pisatit ukioq manna oktobarip aallaqqaataata kingorna kingusinnerpaamillu oktobarip 15-iani nalunaarutigissavatit. Inuussutissarsiutigalugu piniartunut ukiumoortumik immersugassaq aajuk

Piniarnermut allagartaq tunniunneqareersoq akilersimanngikkukku aamma taanna akilissavat.

Inuussutissarsiutigalugu piniartutut allagartaq pisinnaaniarlugu piumasaqaatit naammassigukkit, girokortimik aamma paasissutissiissut Piniarneq ilinnut nassiunneqassapput. Piniarnermut allagartavit akilersimanerata allagartaa uppernarsaatitut toqqornissaa eqqaamajuk. Uppernarsaat netbankikkut akilissallugu iluaqutaassaaq, tassannga uppernarsaat tamatigut naqitanngortissinnaagakku.

Uppernarsaat allakkerivimmi akilersimagukku allagartaalu katallugu, akileqqittariaqassavat, allakkerivimmi sullissineq illit akilissagakku.

Ukioq kaajallallugu

Inuussutissarsiutigalugu piniartutut allagartaq ukioq kaajallallugu qinnutigisinnaavat. Taamaattoq eqqumaffigissavat:

  • Aasaanerani umimmanniarnermut tuttunniarnermullu peqataaniaruit inuussutissarsiutigalugu piniartutut allagartaq maajip aallaqqaataa nallertinnagu akilereersimassaaq, piumasaqaammit tassannga immikkut akuersisoqanngippat
  •  Oktobarip aallaqqaataa ukiumi piniarnerup aallarnerfigaa, ullormit tassannga inuussutissarsiutigalugu piniartutut allagartat atuutilissaaq
  • Oktobarip 15-iat nallertinnagu pisatit nalunaarutigisimassavatit. Pisatit naalakkersuisoqarfiup nalunaarsoreerpagit ukiumut tulliuttumut inuussutissarsiutigalugu piniartutut allagartamik imminik pisumik nassinneqassaatit. Pisatit nalunaarutigisimanngikkukkit piniarnermut allagartat nutartertissinnaanngilat

Sunngiffimmi piniarsinnaanermut allagartamik qinnuteqaatit itigartinneqarsimappat, isumaqaruillu itigartitsineq kukkusumik tunngaveqartoq, nutaanik paasissutissaateqaruit naammagittaalliorsinnaavutit.

Itigartitsineq naammagittaalliuutiginiarukku tamanna ikiut piniarfiusup naanera sioqqullugu pissaaq. Sumiiffigisanni aalisartut piniartullu peqatigiiffiannit KNAPP-mit ilinnik suliassaq pillugu oqaaseqaammik pissarsisinnaaguit, taanna naammagittaalliuummut ilanngullugu nassiutissavat. Naammagittaalliuut Aalisarnermut, Piniarnermut Nunalerinermullu Naalakkersuisoqarfimmut nassiutissavat.

Naalakkersuisoqarfik suli apeqqutissaqassappat atassuteqarfigineqassaatit. Naammagittaalliuutit oqaluuserineqareerpat akissutisissaatit.

Malugiuk

Naalakkersuisoqarfiup aalajangiinera naammaginngikkukku, suliassaq Ombudsmandimut imaluunniit eqqartuussivinnut saqqummiussinnaavat.