Ujaruk

Arferit angisuut

Arferit angisuut Kalaallit Nunaanni eqqissisimatitaapput, taamaattorli arferit sisamat, arfivik, tikaagulliusaaq, tikaagulli qipoqqarlu, eqqissisimatitaanatik.
Taamaattumik neqai, mattai, orsui soqqaalu pillugit arferit taakku angisuut piniarsinnaavatit

Arfernik taakkuninnga angisuunik sisamanik piniarneq pisassiissuteqarnikkut killilersorneqarpoq. Pisassiissutit qanoq agguarneqarsimanera pillugit uani Naalakkersuisut.gl-imi annertunerusumik atuarsinnaavatit. Tassani aamma Danmarkip Kalaallit Nunaat sinnerlugu arfanniarnermut tunngasuni atsiorsimasaani nunani tamalaani isumaqatigiissutit pillugit atuarsinnaavutit.

Pisassiissutit aamma 2006-miit 2017-imut pisatigut killiffiit  uani aasinnaavatit.

Piumasaqaatit

Arferit angisuut sisamat arlaat ataaseq piniarniarlugu

  • Atuuttumik inuussutissarsiutigalugu allagartaqassaatit
  • Arfermik piniarniakkut akuersissuteqassaatit 
  • Akuerisaasumik qamutileqassaatit
  • Piniarnermi sakkut inassutigineqartut atussavatit

Arfernut qaartartut pisiarinissaannut passunnissaannullu arfernik qaartartut atorneqarnissaat pillugu pikkorissarnermi peqataasimassaatit. Arfernut qaartartulimmik immikkut tuukkamik tamatigut piareersimasuuteqartassaatit.

Aammattaaq akuersissummik piginnittutut sumiiffimmi piniarnermut aalisarnermilu nakkutilliisumut qaninnermut piniarnissamut pilersaarut aamma ulloq pillugu tulluartumik piffissaqartumik kalerriissagavit.

Tikaagulliusaaq qipoqqaallu ukioq kaajallallugu piniarneqarsinnaapput, arfivilli tikaagullillu marsip aallaqqaataaniit decembarip 31-annut taamaallaat piniarneqarsinnaallutik.

Nalinginnaasumik arferit inersimasut kisimik piniarneqarsinnaapput. Tikaagulliusaat eqqarsaatigalugit taakku 15,2 meteri sinnerlugu angissuseqassapput. Arfeq arnaviaq piaraqarpat arfeq arnaviaq piaraaluunniit pisarissanngilat.

Piniutit

Tikaagulliusaat qipoqqaallu eqqarsaatigalugit angallatit mikinerpaamik tamakkiisumik 11 meterimik takissuseqassaaq, imaluunniit arfermut ataatsimut tamakkiisumik 9,2 meterimik mikinerpaamik takussusillit angallat ikinnerpaamik marluusinnaallutik.

Arfivik eqqarsaatigalugu arfermut ataatsimut tamakkiisumik 11 meterimik mikinerpaamik takussusillit angallat ikinnerpaamik pingasuussallutik, tikaagullinnut angallatit 9,2 aamma 22 meterit akornanni tamakkiisumik takissuseqassalluni.

Angallatit tamarmik qamutileqassapput tuukkartalimmik aamma ningittakkanut qalorsuarnulluunniit amooruteqassalluni tikaagullinnut minnerpaamik 2 tonsinik kivitsisinnaasumik arfernullu angisuunut allanut minnerpaamik 5 tonsimik kivitsisinnaasumik.



Qamutillit tuukkartalik minnerpaamik 50 millimeterimik sulloqassaaq arfernut angisuunut akuerisaasumik qaartartulik. Arfanniarnerni tamani angallatit tamarmik arfernut qaartartulimmik immikkut tuukkamik tamatigut piareersimasuuteqartassaatit. 

Eqqaamallugu arfernut qaartartup atorneqarnissaa pillugu pikkorissarsimassagavit. Tamatuma saniatigut arferup kivinissaa pinngitsoortinniarlugu nammattunik allunaasaateqarlutit kiisalu aallarniuteqarlutit puttaquteqarlutillu.

Tikaagullinnut immikkut atuuttoqarpoq, piniarneq nunaqqatigiinnut annertuumik pingaaruteqarpat, qoorortuut atorlugit ataatsimoorluni tikaagullinniarnissamut immikkut akuersisoqarsinnaavoq. 

Qoorortuut minnerpaamik 7,62-mik (.30-06) sulloqassapput aamma eqittaannakkanik aallartiinnarianillu atuisoqaqqusaanani. Umiatsiat ikinnerpaamik tallimat piniarnermi peqataassapput, aamma pisamik kommunimut nalunaaruteqarnissamut akisussaasumik siuttumik toqqaasoqassalluni.

Atorluaaneq

Arfeq pissataq tikaagulliusaaq, qipoqqaq tikaagullillu eqqarsaatigalugit niaquatigut imaluunniit arfivik eqqarsaatigalugu sakiaatigut arfernut qaartartumik piaarnerpaamik aallaallugu toqunneqassaaq. 

Tikaagulliit eqqarsaatigalugit toqutsiniarnermi aamma qoorortooq minnerpaamik 7,62 x 63-imik (.30-06) sullulik atorneqarsinnaavoq.

Arfeq illit kommunivit akuerisaani pilaffimmi taamaallaat pilanneqassaaq.

Aamma pisanniit immikkoortut nerineqarsinnaasut tamarmik iluaqutiginissaannut pisussaaffeqarputit. Pisaq tamakkerlugu atorsinnaanngikkukku imaluunniit tunisinnaanngikkukku sinneruttut nunaqqatigiinnut tunniunneqassapput.

Nalunaarutigissavat

Pisat immikkut nalunaaruteqarluni immersugassami, akuersissuterpit peqatigisaanik tunniunneqartumi, kommunimut nalunaarutigissavat. Pisat illit kommuninni nalunaarsortereerukku aatsaat tuniniaasinnaavutit.

Akuersissutit immikkullu nalunaaruteqarnermi immersugassaq ilaatillugit sumiiffinni kiffartuussivimmut neqip ipiutaasartaanik misiligutissanik tunniussinissamut pisussaaffeqarputit. Neqip ipiutaasartaanit misiligutissaq Pinngortitaleriffik, Postboks 570, 3900 Nuummut nassiunneqassaaq, arferit taakku atugaannik nakkutilliinermi atorneqartussaq.

Arfanniarnerup sumi ingerlanneqarnissaa sumilu arfernik takornariartitsinerup ingerlanneqarnissaa pillugu kommunimi ileqqoreqqusaliortoqarsimasinnaavoq.

Arfermik tippussaasimasumik imaluunniit ikilerneqarsimasumik takusaqaruit tamanna ingerlaannartumik piniarnermut aalisarnermillu nakkutilliisumut qaninnermut aamma/imaluunniit immikkoortortami pisortamut Amalie Jessenimut, oqarasuaat 55 33 42-mut/pingaartumut 48 25 20-mut atassuteqassaatit, imaluunniit mail uunga nassiullugu: amalie@nanoq.gl. 

Uani  tamatumani qanoq iliussanerlutit atuarsinnaavutit.