Ujaruk

Puisi

Kalaallit Nunaanni puisit assigiinngitsut arfiniliupput. Qasigiaq aamma puisi sigguttooq eqqissisimatitaapput

Puisit pisassiissutigineqarneq ajorput ukiorlu kaajallallugu piniarneqarsinnaallutik, neqai, amii orsuilu pillugit. Taamaattorli qasigiaq aamma puisi sigguttooq eqqissisimatitaapput, taamaattumillu taakku ilaanik tunisassianillu Kalaallit Nunaanniit annisseqqusaanak.

Puisinik uumasunik Kalaallit Nunaanniit annisseqqusaanngilatit.

Amermik ilaanilluunniit, kalaallisuuliornermi atorneqartussanik, annissinissamut akuersissut pillugu Aalisarnermut, Piniarnermut Nunalerinermullu Naalakkersuisoqarfimmut qinnuteqarsinnaavutit. Puisinit tunisassianik eqqussinermi/annissinermi ilitsersuut uani aaneqarsinnaavoq.

Puisinniarnissamut atuuttumik piniarnermut allagartaqartariaqarputit imaluunniit atuuttumik akiliilluni piniarnissamut allagartaqartariaqarputit.

Arnavissat milutsitsisut piaqqallu miluttut eqqissisimatitaapput. Piaqqat qiviullit (natsit, aataat ussuillu) eqqissisimatitaapput.

Puisinniarniaraanni aallaat minnerpaamik .22-mik kiisalu .17 HMR-imik sullulik atorneqassaaq imaluunniit aallaat qooroqanngitsoq, sullua akuerisaasoq minnerpaaq 20-ussalluni.

Puisinut qassutit 280 millimeterimik nigartallit atorsinnaavatit. Puisinut qassutit illit atinnik nalunaaqutsissavatit, piniareernerullu kingorna qassutit qaqinneqassallutik. Puisinniarnermi qassutit allat atoqqusaanngillat.

Puisinniarnermi timmisartoq, qulimiguulik angallatillu motoorillit atoqqusaanngillat, tassunga ilanngullugu qamuteralaat. Taamaattorli pisat assartornissaat siunertaralugu immap sikuani angallavinnilu akuerisaasuni qamuteralaat atorneqarsinnaapput uuttorniarnermi aamma upernaakkut sikumi piniarnermili atoqqusaanatik.

Piniarfigisamiit puisimit pisarineqartumit neqit, orsoq, ameq allallu atorneqarsinnaasut tamarmik nassarneqassapput imaluunniit taakku inississinnaallugit. Piniarfiusoq qimatsinnagu sinnikut igissavatit.

Puisit pisarineqartut tamaasa ukiumoortumik immersugassaq atorlugu Piniarnermut nalunaarutigissavatit, pisarineqartut ukiumoortumik immersugassamit takuneqarsinnaappata.

Radio atorlugu aamma qaammataasakkut nassitsissutit atorlugit puisinniarneq inerteqqutaavoq.

Puisinik nassitsissuteqartunik pisaqartoqartillugu Pinngortitaleriffik, Postboks 570, 3900 Nuummut saaffiginnissaatit. Pisaqarfik aamma ulloq pillugu paasissutissiissaatit, tamatumalu kingorna Pinngortitaleriffimmut tunniussinissaq nassiussinissarlu pillugu ilitsersuunneqarlutit. 

Qaammataasanut nassitsissutinik nassiussinermi aningaasartuutit Pinngortitaleriffimmit akilerneqassapput.

Puisimik taleqqumigut nalunaaqutserneqarsimasumik pisaqaruit Pinngortitaleriffimmut saaffiginnissaatit. Pisaqarfik aamma ulloq pillugu paasissutissiissaatit, tamatumalu kingorna qanoq iliornissat pillugu annertunerusumik ilitsersuunneqassallutit. Nassiussinermi aningaasartuutit Pinngortitaleriffimmit akilerneqassapput.

Puisinik uumasuuteqassanngilatit.

Eqqaamallugu kommuni kommunimi ileqqoreqqusakkut kommunip imaluunniit aqutsiviup iluani immikkoortuni aalajangersimasuni puisinniarneq pillugu allanik piumasaqaateqarsinnaammat aalajangersagaqarlunilu.