Ujaruk

Nanoq

Kalaallit Nunaanni nanoqarfiit sisamaapput – Ikersuaq, Baffinnip Kangerliumarnga, Ikersuaq Davis aamma Tunu

Nannut aallaaviatigut eqqissisimatitaapput, taamaattorli nanoqarfinnut ataasiakkaanut pisassiissutinik aalajangersaasoqartarluni.

Nunani tamalaani isumaqatigiissutinik, biologit siunnersuutaannik, atuisut ilisimasaannik kiisalu Piniarneq pillugu Siunnersuisoqatigiit tusarniarnerannik aallaaveqartumik nanoqarfinnut ataasiakkaanut ukiumoortumik pisassiissutinik aalajangersaasoqartarpoq. 

Nannuttassat qanoq agguarneqartarneri pillugit Naalakkersuisut.gl-imi uani annerusumik atuarsinnaavutit. Tassani aamma nannunut tunngatillugu Kalaallit Nunaata suliarisimasai nunani tamalaani isumaqatigiissutit atuarsinnaavatit.

Nannunut ajornartorsiutaasunut, tassa imaappoq qimagutsinneqaraluarlutik sumiiffinnut najugaqarfiusunut uteqqittuartartunut tunngasunut uani  immikkut ilitsersuutit aasinnaavatit.

Nannut 2006-miit 2017-imut pisassiissutit - pisassiissutit qasinillu pisaqartoqarsimanersoq uani takusinnaavat.

Nannunniarniaruit

  • Atuuttumik inuussutissarsiutigalugu allagartaqassaatit
  • Akuersissuteqarlutit
  • Qoorortooq akuerisaasoq sullua 30.06-ulluni (7,62 millimeter). Qoorortuut eqqarasuartartut nutsuinnartakkalluunniit atoqqusaanngillat.

Timmisartut, qulimiguullit angallatillu motoorillit, tassunga ilanngullugu qamuteralaat, angallatillu 15 BRT/BT-mik anginerusut nannunniarnermi imaluunniit piniariarfimmut piniarfimmiillu angallassinermut atorneqaqqusaanngillat.

Toqunartut, pullatit, kiisartut, ningarniutit allalluunniit nannunik aalajangiiniarnermi teknikikkut atortut atoqqusaanngillat.

Ukioq kaajallallugu piniarsinnaavutit. 

Taamaattorli Kalaallit Nunaata Kitaani juulip aallaqqaataaniit aggustip 31-annut  eqqissisimatitsisoqartarpoq, ullut taakku marluk ilanngullugit. Tunumi piffissaq eqqissisimatitsiviuvoq aggustip aallaqqaataanit septembarip 30-annut,  ullut taakku marluk ilanngullugit.

Piaqqat arnaviallu piaqqamik ataatsimik amerlanerniilluunniit ingiaqateqartut tamakkiisumik eqqissisimatitaapput. Nanoq piaraq nassuiarneqarpoq nanoq arnaminik pinngitsuugaqarsinnaanngitsoq.

Piniarfigisamiit pisarineqartumit neqit, ameq allallu atorneqarsinnaasut tamarmik nassarneqassapput imaluunniit taakku inississinnaallugit. Piniarfiusoq qimatsinnagu sinnikut tamaasa sapinngisamik igissavatit.

Pisaqarnerit tamaasa immikkut immersugassiakkut, akuersissummut ilanngullugu ilinnut tunniunneqartumi, illit kommuninnut nannunik pisatit tamaasa ingerlaannartumik nalunaarutigisassavatit, tuniniaassanertut imaluunniit tuniniaassanngitsutit apeqqutaatinnagu.

Aamma nanumik pissataqarsimaguit nalunaaruteqassaatit.

Aamma eqqaamajuk ukiumoortumik immersugassiami pisat nalunaarutigissagakku.

Ataatsimoorluni pisaqarnermi pingaarnertut piniartutut toqqarneqartoq pisamik nalunaaruteqartussaavoq piniarnermi peqataasut aqqi aamma CPR-normui tamaasa ilanngullugit allanneqarlutik. Pingaarnertut piniartoq kisimi pisaq ukiumoortumik immersugassakkut naluaarutigissavaa.

Normumik imaluunniit radiukkut nassitsissummik nassaaruit taanna immikkut immersugassamut ilanngullugu tunniutissavat.

Oqqap nuua kiisalu tuloriaq akuersissut immikkullu immersugassiaq ilanngullugit sumiiffimmi kiffartuussivimmut tunniunnissaannut pisussaaffeqarputit. Oqqap nuua tuloriaallu Pinngortitaleriffik, Postboks 570, 3900 Nuummut nassiunneqaqqissaaq, nannut taakkulu atugaat pillugit nakkutilliisut.

Kommunimi imaluunniit nunaqarfimmi allaffiup akuersissut aatsaat naqissuserpagu pisarlu nalunaarsorpagu aatsaat tuniniaasinnaavutit.

Nanumik pisarineqartumit tunisineq imaluunniit pisineq aatsaat pisinnaavoq akuersissummik piginnittup akuersissutip assilinerani uppernarsarlugu atsiorpagu. Assilineranit takuneqarsinnaassaaq pisaq kommunimi oqartussanit nalunaarsorneqarsimasoq. 

Tuniseqqinnermi imaluunniit nannup ilaanik tunisinermi akuersissut atsiorneqarsimasoq naqissuserneqarsimasorlu tunisinermut ilaatinneqassaaq.

Malugissavat nannunniarneq pillugu kommunimi ileqqoreqqusaliortoqarsimasinnaammat