Ujaruk

Imaani uumasut miluumasut

Imaani uumasut miluumasut Kalaallit Nunaanni piniagassatut isumalluutissat annersaraat. Taamaattumik imaani uumasut miluumasut naalakkersuinermik suliaqartunit eqqumaffigilluarneqarput, nunami namminermi aammali nunani tamalaani. Eqqumaffigineqarnerisa ameerlasuutigut soqutiginninnerit imminnut assortuuttut nassatarisarpai

Inuussutissarsiutigalugu piniartutut imaani uumasut miluumasut pingaarnerit piniarsinnaasatit pillugit suut ilinnut piumasaqaataanersut quppernerni ukunani atuarsinnaavatit.

Pingaartumik uumasut pisassiissutigineqartut piniarsinnaasatit, aammali uumasut piniaqqusaanngitsut pillugit piumasaqaatit arlaqartut naammassissavatit maleruagassallu atuuttut malillugit.

Immikkut immersugassaq aammalu ukiumoortumik immersugassaq atorlugit uumasunit pisassiissutigineqartunit pisatit nalunaarusiussavatit. Pisannik nalunaarusiavit aqutsisoqarfimmit tiguneqarnissaa pingaartuuvoq. 

Taamaaliornikkut piniagassaativut pillugit pisat kisitsisitigut paasissutissiissutigineqarnissaat aamma nungusaataanngitsumik atorneqarnissaat qulakkeerinneqataaffigissavat.

Kalaallit Nunaanni arfanniarnermi ileqquusut atuarsinnaavatit uani.

Uani Kalaallit Nunaanni imaani uumasut atiisa neqiinillu iluanaarutaasut allattorsimaffiat aasinnaavat.