Ujaruk

Timmissat

Kalaallit Nunaanni sumiluunniit timmiaqarpoq. Sermersuaq kisimi timmiaqanngilaq. Timmissat tamarmik eqqissisimatitaapput. Taamaattorli timmissat ilai piniarfiusuni sumiiffinnilu aalajangersimasuni piniagaasinnaapput

Kalaallit Nunaanni timmissat assigiinngitsut 60-it missaaniittut piaqqiorput. Timmissat piaqqiortut affaasa missaat ukiuunerani Kalaallit Nunaannit qimaguttarput. 

Timmissat killilersukkat tallimaasut tassaapput, appa, appa sigguttooq, miteq, miteq siorakitsoq qingalillu kiisalu taateraaq. Timmissat assigiinngitsut 16-it pisassiissutaanngitsut piniarsinnaavatit. Taakku allattorneri nalunaarummi § 10-imi uani takusinnaavatit. 

Timmissat illersorniarlugit piaqqiornerisa isanerisalu nalaanni upernaakkut aasakkullu nalinginnaasumik aallaaniarsinnaanngilatit. Malugeqqussavarpulli nunap immikkoortuini piffissat piniarfiusut assigiinngissinnaammata.

Sumiiffiit timmissanik illersuiffiusut 40-iupput. Taakku allattorneri nalunaarummi § 13 naapertorlugu aalajangersagaapput, sumiinnerilu uani takusinnaavatit. Sumiiffinnit taakkunaniit ungasissutsip 500 meterit iluanni maajip aallaqqaataaniit aggustip 31-annut nunamut ikaaqqusaanallu angalaaqqusaanngilatit.

Kalaallit Nunaanni timmissat piniagaaffii tamarmiusut uani takusinnaavatit. Nunap immikkoortuini, zone-t takussutissianngorlugu uani takusinnaatit.

Timmiarniarniaruit inuussutissarsiutigalugu imaluunniit sunngiffimmi piniarnissamut allagartaqassaatit. Aamma mannissarnissamut piniarnermut allagartaqassaatit.

Sakkut piniarnermilu sakkut uku kisiisa atorlugit timmiarniarsinnaavutit:

• Timmiarsiut qooroqanngitsoq annerpaamik 12-mik minnerpaamillu 0.17-imik sullulik

• Timmiarsiutit singissartullit “Pumpgun” eqittaannartakkallu taamaallaat amerlanerpaamik marlunnik imassaqarsinnaasut

• Qajariamit pisisseq imaluunniit nuffit

• Qaanaap Ittoqqortoormiillu aqutsiveqarfiini qassutit miloriuttakkat qassutillu ipullit  appaliarsunniarnermi atorneqarsinnaapput, kiisalu qaqulluit piaraannik ileqquusumik piniartoqarsinnaalluni nalunaarummi § 10 naapertorlugu.

Angallat ingerlatillugu timmissanik timmisunik malersueqqusaanallu piniaqqusaanngilatit. Soorlu aamma qeerlutuunik nerlernillu isasunik ungoorinissaq inerteqqutaasoq. Aammattaaq silaannakkut angallatiniit, angallatinit motoorilinnit qamuteralannillu piniarneq inerteqqutaavoq.

Sunngiffimmi piniarnissamut allagartaqaruit ullormi piniarfimmi ataatsimi mitit aamma miternik siorakitsunik amerlanerpaamik qulinik pisaqarsinnaavutit inuussutissarsiutigalugulu allagartaqaruit amerlanerpaamik 40-t pisaqarsinnaallutit. Sunngiffimmi piniarnissamut allagartaqaruit ullormi piniarfimmi ataatsimi appanik aamma appanik sigguttuunik amerlanerpaamik pingasunik  pisaqarsinnaavutit inuussutissarsiutigalugu piniarnermut allagartaqaruit amerlanerpaamik 20-nik pisaqarsinnaallutit.

Ulloq piniarfiusoq tassaavoq ulloq unnuarlu piniarfigisat. Ulluni piniarfiginngisani ullormut pisassatit imaluunniit ullormut pisassatit tamakkersimanngikkukkit katersorlugit toqqorsinnaanngilatit. Taamatuttaaq kingusinnerusukkut ullormut pisassaagaluit siumoortumik aallaaneqarsinnaanngillat.

Ullormut pisassat inummut tunngasuuvoq allanullu tunniunneqarsinnaanani.

Timmissat pisarisimasatit tamaasa Piniarnermi ukiumoortumik immersugassami timmissat ilaasut ukiumoortumik nalunaarutigissavatit, tassunga ilanngullugit timmissat aalisarnermi saniatigut pisarisimasat.

Timmissamik nalunaaqutsikkamik, radiukkut imaluunniit qaammataasakkut nassitsissummik peqartumik pisaqaruit, taakku Pinngortitaleriffik, Postboks 570, 3900 Nuummut nassiutissavatit, sumi qangalu timmissap pisarineqarsimanera pillugu paasissutissat ilanngullugit.

Aamma illit kommuninni timmiarniarneq pillugu immikkut kommuni ileqqoreqqusaqarsinnaavoq. Sunngiffimmi piniartut pisatik kalaalimineerniarfimmi tuniniarsinnaaneraat pillugu kommunit nammineq aalajangersaasinnaapput. Piniariartinnak tamatuminnga paasisaqarnissannut pisussaaffeqarputit.

Kalaallit Nunaanni timmissat siumorneqarsinnaasut aqqisa allattorsimaffiat uani atuarsinnaavat.