Ujaruk

Piniarneq aallaarniarnerlu

Kalaallit Nunaanni kinguaariippassuit piniarneq inuussutigaat. Ullumikkut imminut pilersorneq aningaasaqarnermut ilassutaavoq pingaarutilik. Piffissami qaninnerusumi aalisarneq Kalaallit Nunaanni pingaarnertut inuussutissarsiutaalernikuuvoq, aammalu Kujataani nutaaliaasumik nunalerineq inerisarneqarluni

Inuussutissarsiutigalugu sunngiffimmilu piniartutut piniagassatut isumalluutissat pillugit inatsisini maleruagassat ilisimasaqarfigissallugit pisussaaffigaat. Piniagassat ataasiakkaat imaani miluumasunut, nunami miluumasunut timmissanullu agguataarlugit nassuiarneqaranerat quppernerni ukunani atuarsinnaavatit.

Ullumikkut inuit 2.030 missaat piniarnermik inuussuteqartuupput, taavalu inuit 3.750 sinnilaarlugit sunngiffimmi piniarsinnaanermut allagartaqarlutik. Imminut pilersorneq suli ileqqut ilagaat, nammineq pisat kisimiilluni atornagit aammali ilaquttanut ilisarisimasanullu pajugutigisarlugit.

Pisat ilaat qimmeqarfinni qimminut nerukkaatissatut aamma atorneqartarput. Inuussutissarsiutigalugu piniartutut allagartaqartut piniarneq kisiat inuussutiginngilaat, aammali aalisartuusarput, annerusumik umiatsiaararsorlutik piniarfiit ukiullu qanoq ilinera apeqqutaatillugit.

Aqutsinermik suliassat Kalaallit Nunaanni piniarnermut tunngassuteqartut, piniarnermut immikkoortortaqarfiup isumagisarai. Isumalluutissat uumassusillit, immami miluumasunut, nunami miluumasunut, timmissanullu tunngassuteqartut atorluarnissaasa aqunnissaat piniarnermut immikkoortortaqarfiup akisussaaffigaa.

Pingaarnertut anguniagaq tassaavoq piniagassat naapertuuttumik pinngortitalerinermilu illersorneqarsinnaasumik atorluarnissaat qulakkiissallugu, tassani piniagassat piujuaannarnissaat kinguaasiornissaallu, isumatuumik piffissaliillunilu pitsaanerpaamik atorluaanerit pingaarnerutillugit.

Piniarnermik inuussutissarsiornerup iluani nalinginnaasumik pinngortitalerinermik siunnersuineq naapertorlugu, aningaasaqarneq suliffissaqartitsiniarnerlu aammalu inuussutissarsiutit tassunga attuumassuteqartut, inuussutissarsiornermi soqutigisat allat aammalu innuttaasut peqqissinartunik pisariaqartitaat eqqarsaatigalugit tamanna pissaaq.

Tamakku saniatigut piniarnermut tunngasuni piniartut atuisullu ilisimasaasa atorneqartarnissaat pingaartinneqassapput.

Piniagassanut tunngasunik apeqqutissaqaruit kommunimut imaluunniit sumiiffigisami piniarnermik nakkutilliisumut tamatigut saaffiginnissinnaavutit. Isumalluutissatta uumassusillit atorluarnissaat pillugu apeqqutit amerlanersaat taakku akisinnaavaat.