Ujaruk

Aalisarnermut aningaasaliissutinut immikkoortitat isaterinissamullu aningaasaliissutit

Aalisarnermut aningaasaliissutit sinerissap qanittuani aalisariutit ingerlaavartumik taarsernissaannut nutarternissaannullu atorneqartarput, sinerissallu qanittuani aalisarsinnaasut amerliartornerinut naleqqussaassutaalluni

Sinerissap qanittuani aalisartutut aalisariutivit nutarterneranut nutaanillu suliniutinik pilersitsinissamut qinnuteqarsinnaavutit, misileraalluni aalisarnernut assigisaannulluunniit aalisarnerup ineriartortinneqarneranut aalisakkallu pisuussutitut aalisarneqarnerinut iluaqutigineqarsinnaasumik.

Aalisariutit ukiunik 25-nik pisoqaaneruppat isaterneqarnissaanut qinnuteqarsinnaavutit.

Isaterititsinissamut tapiissutinik piniaruit ilaatigut makku piumasarineqartut naammassisimassavatit:

  • Umiarsuarnik nalunaarsuiffiup aalisariutit pillugit nalunaarsuutaanni imaluunniit angallatit nalunaarsorsimaffianni nalunaarneqarsimassaaq, Aalisarnermut, Piniarnermut Nunalerinermullu Naalakkersuisoqarfiup aalisariutit nalunaarsorsimaffiani aamma nalunaarsimassaaq, inuussutissarsitigalugu aalisariutitut akuerineqarsimassalluni.
  • Aalisariutit 5 BRT/8 BT-mik oqimaannerussaaq 75 BRT/120 BT-milli oqinnerussalluni.
  • Ukiunik 25-nik taakkuluunniit sinnerlugit pisoqaanerussaaq

Aalisariutip nalinga tunngavigalugu tapiissutit amerlassusilerneqartarput. Aalisariut aarlaannaannulluunniit attuumassuteqanngitsumit nalilerneqartarpoq, taanna APNN-imit akuersisartoq toqqarneqartarpoq.

Aalisariummik isaterineq inatsisit naapertorlugit pissaaq.

Qinnuteqaatit Aalisarnermut, Piniarnermut Nunalerinermullu Naalakkersuisoqarfimmut, Postboks 269, imaluunniit apnn@nanoq.gl-imut nassiutissavat. Immikkut immersuiffissaqanngilaq. Naalakkersuisoqarfiup telefonera 34 53 28

Kommunerisat qinnuteqarninnut ikiuussinnaavoq. Aamma Aalisarnermut, Piniarnermut Nunalerinermullu Naalakkersuisoqarfimmut attaviginnillutit ikioqqusinnaavutit.

Pissusissarinngisaatut tapiissutisisimaguit Naalakkersuisut piumasaqarsinnaapput tapiissutisiarisimasavit utertinneqarnissaannik. Aamma paasissutissanik eqqunngitsunik tunngavilersorlutit qinnuteqarsimaguit, taama pineqarsinnaavutit.

Aamma taama pisoqarsinnaalluni tapiissutinik pisimaguit, piumasaqaatigineqartut aamma tunngaviginagit pisimaguit.

Maalaarut

Isaterinissamut tapiissutinik piniarninni akuerineqarsimanngikkuit maalaarsinnaavutit, isumaqaruit:  

  • Akuerineqannginnerit eqqunngitsumik tunngaveqartoq
  • Qinnuteqaatinnut tunngasumik nutaanik paasissutissaqalersimappat

Maalaaruteqarsinnaavutit allakkat itigartitsissummik allassimasut tiguneranit ullut 14-init qaangiutsinnagit. Maalaarutit Aalisarnermut, Piniarnermut Nunalerinermullu Naalakkersuisoqarfimmut nassiutissavat.

Pingaarpoq maalaarutit tunngavilersorluassagakku. Maalaarutit suliarineqareerpat akissutisissaatit. Naalaakkersuisoqarfiup akissutaa naammaginngikkukku Ombudsmandimut maalaaruteqarsinnaavutit.