Ujaruk

Avatangiisinut sunniutit toqqaannartuunngitsut

Aluminiumut suliniutitut ittumit sunniutit ilaat aluminiuliorfippiamit imaluunniit tassunga atasutut erngup nukinganik nukissiorfinnit toqqaannartumik pineq ajorput. Tassaasinnaapput suliniutip nassatarisaanik inooqatigiinnermi allannguutit nassatarisaannik sunniutit arlallit.

Maniitsup allineqarneratigut angallanneq, atuineq ulluinnarnilu pissuserineqartoq sunnertussaavaa, sunnertinneq najukkami innuttaasut kulturiannut, aningaasaqarnerannut il.il. attuisinnaalluni. Suliniummi toqqaannanngitsumik sunniutigisinnaasat – pitsaasut akornutaasinnaasullu – paasilluarneruniarlugit pinngortitamit isumalluutinik atuineq, inuunermi atukkat kulturikkullu allannguutit misissorneqassapput. Innuttaasut peqqissusaat misissuinerit taakku ilaattut ilanngunneqassapput.

Aluminiuliorfiup akuutissanik aniatitsineranut killiliussat inississorneqassapput, taakkulu ingerlatsiviup malissavai. Nunat tamalaanit minnerpaaffissanik piumasaqaatit aamma killiliussat arlallit pioreerput. Najukkamili killiliussat sakkortuneruppata taakku atuutissapput. ASN-imi misissukkanut atorneqartutut killiliussat Najoqqutat atorneqartut sammisat pillugit immikkoortumi ilaatigut nassaarisinnaavatit.