Ujaruk

Erngup nukinganik nukissiorfimmit Innaallagissallu aqqutaannit

Aluminiuliorfimmut erngup nukinganik nukissiorfiit inoqarfinniit ungasissumut inissinneqassapput. Taamaattumik misissuinerni sunniutit misissugassat tassaapput pinngortitamut, kulturikkut eriagisassanut uumasunullu tunngasut.

vandkraft

Erngup nukinganik nukissiorfiit sapusiartaqartut kuup sarfarnera, erngup sananeqaataa aamma tatsit imartussusaat, kuuillu manna tikillugu erngup immap tungaanut kuuffigisaat allanngortittarpaat. Tatsit imissamaateqar­fiusut eqqaanni erngup tarajoqanngitsup sumiiffigisaanni tamatigoortutut uumassusillit assigiinngisitaarneranntu ilaliullugit tuttut, umimmaat eqaluillu amerlassusaat, taakkulu sumut angalaartarnerisa erniortarnerisalu ilusaat piviusutut misissorneqassapput. Erngup pissusaata aammalu sioqqat kiviorartut timitalittut allannguutaat misissuinermi ilaassapput.

Misissuinerit piniartunut, aalisartunut aamma pinialuttartunut attuumassuteqarput. Taamaattumik inuiaqatigiit ilisimasaat aamma misissuinermi ilanngunneqassapput. Taakku ilutigalugit kulturikkut eriagisassat itsarsuarnitsanik misissuinikkut misissorneqassapput. Tatsit qaffanneqannginnerini kulturikkut eriagisassat pingaarnerit assanneqarlutik katersorneqassapput, taamaalilluni oqaluttuarisaanikkut ilisimasat eqqaassutissallu annaaneqassanngimmata.

Misissuinermi assingusutut ilaapput innaallagissap aqqutissaanut tunngasut, sanaartornerup nalaani annerpaamik sunniuteqartussaasut.

Innaallagissap aqqutissat sunniutigisinnaasaannik miisssugaqarniarluni ingammik tuttunut, kiisalu itsarsuarnitsanik misissuinernut sunniutaasunik misissuinerit ingerlanneqassapput.