Ujaruk

Naalakkersuinikkut anguniakkat

Ukiorpassuarni Kalaallit Nunaata aningaasarsiornikkut imminut namman­nerusumik ingerlalernissaata sulissutiginissaa anguniagaasimavoq. Ka­laallit Nunaat siunissami namminiilersussaavoq, namminerlu inuiaqatigiit atugarissaarnissaat ineriartornerallu qularnaartussaallugu. Nunani killerni allani pissutsinut naleqqiullugu Kalaallit Nunaat ilinniartitaanikkut kinguar­simasorujussuuvoq, tamannalu nunap tunisassiorsinnaaneranut unammil­lersinnaaneranullu aporfiuvoq. Pilersitat pillugit uani annertunermik atuarit.

Kalaallit Nunaanni inuussutissarsiutaareersuni aalisakkanillu suliffissuaqar­nermi suliffissat ikiliartortuarput. Siunissami namminersorluni inuussutissar­siorfiup inuiaqatigiinnut annertunerusumik pilersuisooqataanissaa, taamalu aningaasarsiornermut tamarmiusumut pisortat ingerlatsiviisa sullissinerisa pilersuinerisalu minnerulernissaat kissaatiginartuuvoq. Taamaattumik inuiaqatigiitsinnut suliffinnik nutaanik, ingerlalluartunik neqerooruteqar­sinnaaneq pisariaqartitsineqassaaq

Erngup nukinganik nukissiornermut attavilikkatut tunisassiorfissuup suliffiit aalaakkaasut ataavartullu amerlasuut neqeroorutigisinnaavai. Tamanna aamma makkununnga aqqutissiuisinnaavoq:

  • Ilinniarnissamut suliffimmillu sungiusarnissamut periarfissat nutaat
  • Ilinniakkanik pisarsiareriikkanik pitsaanerusumik atugaqarneq
  • Inuussutissarsiorfiup ilusaata allanngortikkiartuaarnera, aamma inuussutissarsiutitoqqat suliaqarfigisatut ilaasa nukittorsagaanissaannut ilapittuisinnaasut.

Tamanna nammineq pinavianngilaq. Politikerinit inuussutissarsiorfimmillu suliaqarnissamik iliuuserisanillu pisariaqartitsivoq, inuiaqatigiinnullu tun­ngatillugu sunniutaasinnaasunik sukumiisumik misissueqqissaarinissaq pingaartuuvoq.

Kalaallit Nunaanni siunissami tunisassiorfissuaq najukkami kulturimut oqaatsinullu naleqqussassaaq. Siunissami sulisuusut sammisamikkut ine­riartorneranni allamiut oqaasiinik, ingammik tuluttuumik pikkorissarnissaat pingaartuussaaq, ulluinnarnili oqaaserisat ungasissoq isigigalugu tassaas­sapput kalaallit oqaasii. Suliffeqarfik najukkamilu suleqatigisai inunnut as­sigiinngilluinnartunik pikkorissuseqarfilinnut piginnaasalinnullu suliffe­qarnikkut periarfissanik neqerooruteqarsinnaassapput.

Kalaallit Nunaanni tunisassiorfissuarmik sanaartornermut suliniut tassaa­voq suliniummut taama ittumut Namminersorlutik Oqartussat piginnit­tuunermut ilaassanerannut siunissami naalakkersuinikkut isummernissaat.

Kalaallit piginneqataasinnaanerannut apeqqut naleqquttoq tassaasinnaa­voq pilersaarutip aningaasaliiffissatut pitsaasutut isikkoqarnissaa - soorlumi aamma tamanna namminersortup kialluunniit aningaasaliiniarneranut toq­qammavigineqartartoq. Taamaattorli pisortaniit aningaasaliisoqarsinnaane­ra aamma pisortat nalinginnaasumik aningaasaqarnerannut sanilliussuun­neqartariaqarpoq.