Ujaruk

Kalaallit Nunaanni erngup nukinganik nukissiorfioreersut

Namminersorlutik Oqartussat nukissiornermut suliffeqarfiutaata, Nukissiorfiit, Kalaallit Nunaanni Teknikikkut Aaqqissuussisoqarfik,
GTO-p, illoqarfinnut nunaqarfinnullu pilersuinissamik pisussaaffigisaa pingaarnertut suliaqarfittut ingerlateqqippaa, 1993-imilu Kalaallit Nunaanni erngup nukinganit nukissiorfik siulleq Nuummut sarfamik kiassarnissamullu atugassamik pilersuilerpoq.

Kangerluarsunnguup eqqaani erngup nukinganik nukissiorfik (Nuuk)

Kangerluarsunnguup eqqaani erngup nukinganik nukissiorfik 1993-imi ator­neqalerpoq, tassaavorlu Kalaallit Nunaanni erngup nukinganik nukissiorfiit siullersaat. Nukissiorfippiaq qaqqap iluani 600 meterini ilorpasissusilim­miippoq, sulluliarlu 14 km-inik takissuseqarpoq. Erngup nukinganik nukis­siorfik illoqarfiit pingaarnersaat Nuuk innaallagissamut kiassarnermullu innaallagissamik pilersugaqarfigaa.

Kangerluarsunnguami nukissiorfimmi kaavittulit pingasut ullumikkut sarfaq 45 MW = 45.00 0 kilowatt = 45.000.000 watt nukissiaraat.

Kaavittut pingajuat 2008-mi ivertinneqarpoq, nukissiorfik ilassutinik 15 MW-inik sarfaliortilerlugu, tamakkiisumik sarfaliarisaq 45 MW-inngortillugu.

Buksefjorden

Tasiilap eqqaani erngup nukinganik nukissiorfik

Tasiilap eqqaani erngup nukinganik nukissiorfik pisortatigut 2005-imi u­pernaakkut atoqqaarfissiortinneqarpoq. Illoqarfimmut avannaq-kippasissu­mi 3 km missaannik ungasissusilimmiippoq, sarfarlu 1,2 MW piliaraa.

Tasiilap eqqaani erngup nukinganik nukissiorfik innaallagissamut kallerup-inneranik illoqarfik taamaallaat pilersorpaa, kiassarnermut atugassanut atorneqarsinnaannginnera pissutigalugu.

Tasiilaq

Qorlortorsuarmi erngup nukinganik nukissiorfik

Qorlortorsuarmi erngup nukinganik nukissiorfik 2007/08-mi atulerpoq, illo­qarfiit Qaqortoq Narsarlu pilersugaralugit. Taamaalilluni Qorlortorsuarmi erngup nukinganik nukissiorfik Kalaallit Nunaanni illoqarfinnik arlalinnik pilersuisuni siullersaavoq.

Erngup nukinganik nukissiorfimmi kaavittut marluk kattullutik 7,2 MW-inik sarfaliorput, illoqarfiit innaallagissamik pilersorlugit. Qaqortoq kiassarner­mut siunertanut innaallagissamik ilaannakortumik pilersugaavoq, Narsarli taamatut pilersuiffiginissaanut nukissaq amigarpoq.

Qorlortorsuaq

Sisimiut eqqaanni erngup nukinganik nukissiorfik

Sisimiut eqqaanni erngup nukinganik nukissiorfik 2009-p naanerani inger­lalerpoq, annertunerpaamik 15 MW-inik sarfaliortunik kaavittoqarluni marlunnik. Sisimiuni kiassarnermut siunertanut nukissiorfik aamma nukissamik pilersuivoq. Nukissiorfiup taseq Tasersuaq atuiffigaa, illoqarfimmullu avannaq-kangiani 27 km missaanni inissisimaffeqarpoq.

Sisimiut

Ilulissat eqqaanni erngup nukinganik nukissiorfik
Ilulissat eqqaanni erngup nukinganik nukissiorfik 2012-imi ingerlanneqa­lerpoq, nukissiorfimmilu kaavittut pingasut tamakkerlutik 22,5 MW-imik sarfaliortuupput.

Ilulissat