Ujaruk

Tasersiaq

Tasersiaq Kalaallit Nunaanni tatsit takinersaraat Kangerlussuarmiillu 100 km-it missaannik kujasissusilimmiilluni. Tatsip qaava 682 meterit missaanni qaffa­sissusilimmiippoq. Qaqqanit portusuunit avatangerneqarsimanini pissutigalugu nuna tamaani kooqarfiusoq annikitsuinnaavoq. Tasersiaq iigartunit tatsip kangisissuani kujasissuanilu inissisimasunit imertaqartinneqarneruvoq. Nassataraa tatsip ernga sioraaqqanik iigartartunit pisunit akulerujussuunera, taamaattumillu aalisakkanit uummaffigineqarsinnaannani.

Nukissaq sapinngisamik annertunerpaaq iluaqutiginiassagaanni Tasersiap ernga kujammut kimmut sammisumik ingerlaarfilerneqartariaqarpoq sulluliaq 30 km missaanni takissusilik atorlugu, Kangerluarsussuup qinnguani erngup nukissiorfimmut atanilerlugu.

1970-kkunni ingeniørit misissuineranni siusinnerpaani takorloorneqarsimavoq kuuk avannamut kimmut Arnangarngup Qooruanut, Kangerlussuarmi paalimmut kuuttoq atuarlugu sulluliortoqassasoq.

Taamatuttaaq pinngortitaq mianeriniarlugu teknikkillullu periarfissat tunngavigalugit Kangerlussuatsiap tungaanut sulluliortoqarnissaa kajungerineqarpoq. Taamaalilluni Arnangarngup Qoorua eqqissisimatitaq ataavartussanik sanaartorfigineqassanngilaq, sulluliarlu naanerussaaq taamatullu tatsip aamma erngup nukissiorfiup akornat sivinganerussalluni.

Suliniummi sanaartugassanut ilaassapput sapusiat marluk, taakku portunersaat 37 meter angullugu portussuseqartariaqassagunarluni.

Tasersiap erngata qaffatsinnissaanut pissutaanerpaavoq taseqarfissap angisuutinnissaa: Taseq angineruppat itineruppallu imeq naammattumik annertussusilik ukiukkut sulluliakkoortinneqarsinnaassaaq, tatsillu imartussusia sillimmataassaq ukiut ilaani issinneruffiusuni panerneruffiunerusunilu imeq sialummit sermillu aaneranit pisoq annikilleriassagaluarpat. Tatsip misissor­neqarneranissaaq paasinarsivoq sumiiffiit ataasiakkaat ikkattuararsuusut.

Taseqarfissaq ulikkaaqqatillugu tatsimiit kangerlummut nakkariarfik 709 meteriussaaq. Tatsip qaava annerpaamik 24 meterinik qaffatsinneqarpat 190 km2-it missaanniknik angissuseqalissaaq.

Tasersiaq saputilerneqaruni erngata annertunerpaaffissaa ataani assilialiami takutinneqarpoq. Tatsip pissusimisut annertussusia aappaluttumik titarnilerlugu takutinneqarpoq.

Tasersiaq kort

Ukiuni kingullerni 20-ni imeq kuuttoq pillugu paasisutissat tunngavigalugit siullermik ilisimagisamit Tasersiaq nukissamik anginerusumik aallerfigine­qarsinnaasoq paasineqarpoq. Tamatuma taama avinngarusimatigisumi erngup nukinganik nukissiorfiliornermi, sulluliornermi sapusialiornermilu ingeniøritut annertuumik unammillerfiusoq qaangerlugu pissaqarfiulersip­paa. Tasersiaq Kalaallit Nunaanni nallerneqarsinnaanngitsumik erngup nukinganik nukissiorfiliorfissani piukkunnarnerpaavoq.

Tasersiap nukimmik pilersitsisinnaassusia naatsorsuutigineqartoq: ingerlaavartumik 475-500 MW.