Ujaruk

Tarsartuup Tasersua

Tarsartuup Tasersua Nuup Maniitsullu akorngisa qeqqani avannamut/kujam­mut sammivilimmi inissisimavoq, illoqarfiit taakku marluk 120 km missaanni kangianiilluni. Piukkunnaammut imeqarfissatut pingaarnerpaarpaaq tassaavoq tatsip isuani kangillermi sermermit iigartartumit sermip aannera. Nassataraa tatsip ernga sioraaqqanik iigartartumit pisunik akoqarnera, avatangiisillu misissorneranni taseq aalisagaqanngitsoq paasineqarpoq. Taseqarfissaq anneq tassaavoq Tarsartuup Tasersua, kujasinnerusumiilluni alla mikineq, erngup nukinganik nukissiorfissamut sulluliassap aallaaveqarfissaa. Sulluliassaq 10 km missaannik takissuseqassaaq, nukissiorfimmullu Nuup Kangerluani Anavimmi qaqqamut sulluliaralugu qaartiterlugu inissisimasussamut anillaffeqassalluni.

Sanaartugassanut sapusiassat arfinillit tikillugit ilaapput, taakkunannga portunersaat 32 meter missaaniissasoq naatsorsuutigineqarluni. Ikerasaliat pingasuusinnaapput, takinersaat 720 meterit missaannik takissuseqassalluni, sulluliallu pingasuusinnaapput, takinersaat 2 km missaannik takissuseqassalluni.

Tarsartuup Tasersuata erngata qaffatsinnissaanut pissutaanerpaavoq taseqarfissap angisuutinnissaa: Taseq angineruppat itineruppallu imeq naammattumik annertussusilik ukiukkut sulluliakkoortinneqarsinnaassaaq, tatsillu imartussusia sillimmataassaq ukiut ilaani issinneruffiusuni panerneruffiunerusunilu imeq sialummit sermillu aaneranit pisoq annikilleriassagaluarpat. Sulluliat ikerasaliallu erngup tatsinit mikinerusunit Tarsartuullu Tasersuata timaanit pisup kuuffissaattut atorneqassapput, taamaalillunilu piukkunnaataasup angissusia annertusitinneqassaaq.

Tarsartuun Tasersuq kort

Tatsip erngata qaava annerpaamik 20 meterinik qaffatsinneqarpat tatsip qaavata angissusia annertunerpaafissamigut 95 km2 missaaniilissaaq.

Tarsartuup Tasersuata nukimmik pilersitsisinnaassusia naatsorsuutigineqartoq: 175-200 MW. Tarsartuup Tasersua taamaalilluni Tasersiamit mikinerujussuugaluarluni Islandimi erngup nukinganit nukissiorfiit anginerpaartaarta tulliatut, Hraunayjafossitut angissuseqassaaq, Kalaallit Nunaannilu maannakkut Utoqqarmiut Kangerluarsunnguanni erngup nukinganik nukissiorfiit annersaannit sisamariaammik angissuseqassalluni.