Ujaruk

Nukissamik piukkunnaammik naatsorsuineq

Erngup nukinganut piukkunnaatip annertussusia nalilersorsinnaajumallugu qaqqanit aamma sermersuarmit eqqaaniittunit apummit aamma sialummiit erngup tasernut kuunnera ilisimaneqartariaqarpoq.

Asiaq – Kalaallit Nunaanni Misissueqqaarnerit – Kalaallit Nunaanni erngup nukinganik nukissiorfinnut piukkunnateqartuni pingaanerni arlalinni hydrolo­giskimik uuttortaatinik ingerlataqarpoq, taakku ilaatigut sialertarneq/apisarneq erngullu inissisimaffigisaa uuttortartarlugit. Uuttortaanernit paasissutissat tunngavigalugit ukiup ataatsip ingerlanerani tatsit aqqusaarlugit imeq qanoq annertutigisoq kuuttarnersoq naatsorsorneqartarpoq.

  • Tatsip angissusaa uuttortarneqartarpoq, itsissutsillu ekkolodi atorlugu misissugaasarlutik, imeqassuseq naatsorsorneqarsinnaaniassammat. Tamanna ilutigalugu erngup nukinganik nukissiorfiliaallugu erngup sullukkut aniaffissaata inissiffissaa nassaariniarlugu itinerpaaffiit ujarneqartarput.
  • Tatsip imeqassusaata sapusiorluni qaffanneqarsinnaanera (erngup annerpaamik inissisimaffigisinnaasaanut qaffatsillugu) taamaalilluni innaallagissiorsinnaaneq annertusineqarluni tatsit annerpaamik imaqalersinnaanerat assupilussuaq pingaaruteqartuuvoq.
Energipotentialet

Sapusiat aamma erngup nakkaasarfia annertusarsinnaavaat. Taamaaliornikkut tatsip imaanik nukimmik atorluaanerusoqarsinnaavoq.

Misissuinerit siuliani taaneqartut tamatigut erngup nukinganik nukissiorfinnik sanaartulinnginnermi ingerlanneqartarput, ukiumiillu ukiumut sialuup aammalu sermersuarmiit apummiillu iminngortup annertussusaata allanngorarsinnaasar­neri ilisimassallugit pingaaruteqarpoq. Sila ukiumi nillerluni apinikillunilu sialu­killiorfiusimanerata malitsigisinnaavaa nukissiorfiup appasinnerusumik innaallagissiortariaqarnera, ukiuunerani imeqarfik imaarutinnginniassammat. Piffissami sivisunerusumi annikitsumik kuuttoqarfimmik atugassaqartillugit tatsit iemqarfiusut naammattumik piginnaaneqartinnissaasa qulakkeernerisigut aarleqqutaasoq tamanna pitsaanerpaamik akiorneqarsinnaavoq.

Erngup nukinganik nukissiorfik imeq sukkasuumik kuuttoq kaavittartukkoortil­lugu nukissamik tigooraaffigisarpaa. Kaavittartullu nukissaq taanna innaallagis­sap sarfanngortittarpaa, sarfarlu sumiiffinnut sarfamik atuiffiusunut nuna iso­rartooq aqqutigalugu ingerlateqqinneqartarpoq. Sarfaq pilersinneqartoq anni­killisinneqarsinnaavoq imaluunniit annertusineqarsinnaavoq imeq kaavittar­tukkut kuuttoq annikillisinneratigut imaluunniit annertusineratigut.

Nukissap piukkunnaataa naatsorsorlugulu sanaartugassanik pilersaarusiornermi tatsit imeqarfiit erngup nukinganut atorneqartussat siunissami qanoq imaqartigisinnaanerinut siulittuutigisat sapinngisamik eqqornerpaajunissai qulakkeerniarlugit ukiorpassuarnit uuttortaasimanernit paasissutissat pisariaqarput. Taamaasllluni ullumikkut uuttortaanerit siunissami ukiut 20 qaangiuppata erngup nukinganik nukissiorfiliornissat pillugit aalajangernissamut pingaaruteqariaannaapput. Tasernut ataasiakkaanut, ilaatigut Tasersiamut erngup pissusaani paasissutissanik Asiaq katersaateqarpoq 1970-ikkulli qeqqanneersunik.