Ujaruk

Kalaallit Nunaanni erngup nukinganik nukissiornissamut piukkunnaatit

Nukissiornissamut sialuk apullu qaqqanut imaluunniit sermersuarmut nakkaasoq periarfissanik pilersitsisarpoq. Nakkaasut annertusiartortillugit aamma nakkaaffiat katersuuffiallu qutsineruleriartortillugit nukiit annertunerusut katersuunnerat annertusiartortarpoq.

Kalaallit Nunaanni amerlasuunnik erngup nukinganit nukissiorfiliornissamut piukkunnartoqarpoq. Ingammik Kujataanni arlallit ima annertutigaat innuttaasut innaallagissamik pisariaqartitsinerannik qaangeerujussuarlutik.

1975-imiilli Kalaallit Nunaanni Teknikikkut Aaqqissuussisoqarfik, GTO, aamma taamanikkut Kalaallit Nunaanni Ujarassiornermut Aaqqissuussisoqarfik ataqatigiissaartumik aaqqissuussamik sumi Nunatsinni erngup nukinga atorlugu nukissiorfiliortoqarsinnaanersoq nalunaarsorsimavaat.

Aallaqqaataani illoqarfiit qanittuiniinaanngitsoq aammali sumi erngup nukinga atorlugu nukissiorfiit anginerpaat inissisiffissaat GTO-p ujartorsimavai.

Nukissap pilersinneqartup annerpaartaa aatsitassarsiornerup iluani atorneqarumaartoq taamanikkut takorloorneqarpoq.

Suliffeqarfiit nukissamik annertuumik atuisussat pillugit erngup nukinganit nukissiorfiliussagaanni misissueqqaarnermut sanaartornissamullu annertoorujussuarnik aningaasartuuteqartoqassaaq, 1970-ikkullu naalerneranit GTO-p suliffeqarfiit angisuut eqqarsaatigalugit pisortat misissuisarnissaat pisariaarukkiartuinnartutut isigilerpaa. Nukissiorfiit pilersuinissamut pisussaaffeqarfigisaanni, aamma nukissamik tunisassiarisamik qularnaatsumik tunisisinnaaffiini GTO-p illoqarfiit qanittuini piukkunnaatit nalunaarsorlugit aallunnerulerpai.

Aatsitassarsiornissamut misissuisoqartillugu erngup nukinganit nukissiorfiit isumaliutigineqartaraluartut pisortat imaluunniit suliffeqarfiit Kalaallit Nunaanni tunisassiorfissuarnut erngup nukinganit nukissiornissamut piukkunnaatit sinnerinik nunani tamalaani suliffeqarfinnut sarfamik annertuumik atuisartunut suliaqartoqarluni pilerisaarisoqanngilaq.

Asiaq – Kalaallit Nunaanni Misissueqqaarnerit - sumiiffinni toqqartukkani ataavartumik erngup pissusaanik uuttortaajuarnernik ingerlataqarput, taamaalillutik Kalaallit Nunaanni suli atugaanngitsunik erngup nukinganik nukssiornissamut isumalluutinik arlalinnik siunissami peqiarfissat pillugit ilisimasat annertusiartuinnartillugit.