Ujaruk

Uumassusillit sananeqaataasigut kingornuttagaasunik isumalluutinik katersillunilu ilisimatusarneq

Kalaallit Nunaanni uumassusillit sananeqaataasigut kingornuttagaasunik isumalluutinik katersillutillu atuinissamik kissaateqartut suliffeqarfiit, ilisimatusarfiit allallu tamatumunnga aqqutissiuunneqarnissamut qinnuteqassapput, kiisalu niuernermi atuinermut sinneqartoorutinik agguataarinissamut isumaqatigiissut atsiussallugu.

Uumassusillit sananeqaataasigut kingornuttagaasunik isumalluutinik atuinissamut tunngatillugu Uumassusillit sananeqaataasigut kingornuttagaasunik isumalluutit tamatumunngalu atatillugu suliniutit pillugit Inatsisartut inatsisaat nr. 3, ulloq 3. juni 2016-imeersoq aqqutissiuinermut aamma iluaqutaasunik agguataarinermik inatsisiliivoq. Inatsit taamaallaat uumassusillit sananeqaataasigut kingornuttagaasunik isumalluutinik taamaallaat atuutsitaavoq, siusinnerusukkullu 2006-imit Kalaallit Nunaanni inatsisaasumik, uumassusilinnit isumalluutinik tamanik imaqartoq oqilisarpaa.

Uumassusillit sananeqaataasigut kingornuttagaasunik isumalluutinik aqqutissiuunneqarnissaq, kiisalu taakkuninnga atugaqarnermit iluaqutaasut tulluartumik aamma naapertuulluartumik agguataarinissaq pillugit Nagoya-protokolimi tunngavigisanik Kalaallit Nunaanni inatsisaasoq tunngaveqarpoq. Kalaallit Nunaanni inatsisaasumut siunertaq aamma tassaavoq uumassusillit sananeqaataasigut kingornuttagaasunik isumalluutinik atuinermi iluanaarutit tulluartumik annertussusaasa Kalaallit Nunaannit pissarsiarinissaasa qulakkeernissaat.

Uumassusillit sananeqaataasigut kingornuttagaasunik isumalluutinut aqqutissaq

Kalaallit Nunaanni inatsisaasumut pingaarnertut tunngavigisaq tassaavoq Kalaallit Nunaanni uumassusillit sananeqaataasigut kingornuttagaasunik isumalluutinik ilisimatusarnermik ingerlataqarnissamik suliffeqarfiit/ilisimatusartut allallu kissaateqassappata uumassusillit sananeqaataasigut kingornuttagaasunik isumalluutinik katersuinissamut aqqutissiuunneqarnissaq, kiisalu sioqqutsisumik ilisimatitsissutaasumik akuersaanermut isumaqatigiissummik (Prior Informed Consent) atsiugaqarnissaq pillugit qinnuteqartoqassaaq.

Assersuutigalugu nunamut allanngutsaaliukkamut aamma naasunik katersuinissamut aqqutissiuunneqarnissamut tunngatillugu akuersissutit allat piumasaqaataasinnaapput. Uani annertunermik atuagassaqarpoq. Kalaallit Nunaanni uumassusillit sananeqaataasigut kingornuttagaasunik isumalluutinik katersisoqartillugu akuersissutit ilaalu ilanngullugit tamaasa pissarsiarinissaasa qulakkeersimanissaat qaqugumulluunniit qinnuteqartup akisussaaffigaa.

Uumassusillit sananeqaataasigut kingornuttagaasunik isumalluutinik atuinerit

Isumalluut pissarsiarisaq niuernermut atugaalissappat Namminersorlutik Oqartussallu sinneqartoorutinik aggutaarinerit pillugit pissutsit isumaqatiginninniutaassapput (Mutually Agreed Terms).

Uumassusillit sananeqaataasigut kingornuttagaasunik isumalluutinik atuinerniipput sutigulluunniit katersuinerit, toqqortaqarnerit, nalunaarsuinerit, pissarsiaqarnerit, nuussinerit tigusinerillu. Tamakku saniatigut atuinermiipput isumalluutinik katersanik tunngaveqartumik suliarineqartutut ilisimatusarnerit ineriartortitsinerillu. Isumalluummik tunngaveqartitamik patentiliineq aamma sinneqartoorutinik agguataarinissaq pillugu isumaqatigiissuteqarnissamut piumasaqaammut ilaavoq.

Sinneqartoorutinik agguataarineq tassaasinnaavoq iluaqutit aningaasanut aamma aningaasanuunngitsunut tunngasut, tamannalu Namminersorlutik Oqartussat aamma qinnuteqartup akornanni immikkoortillugit isumaqatiginninniutaasinnaavoq. Siunneqartoorutinik agguataarinermiissinnaapput royalty, angusaqarfikkaani akiliutit, ilinniartitaaneq, ilinniartitsineq assigisaallu.

Suliamik isumaginninnermut piffissaq qaammatit pingasut tikillugit sivisussuseqarsinnaasoq malugiuk, taamaattumillu piffissaqarluarluni aqqutissiuunneqarnissamut qinnuteqartoqarnissaq inassutaavoq.

Uumassusillit sananeqaataasigut kingornuttagaasunik isumalluutinik katersillunilu atuineq pillugit Kalaallit Nunaanni malittarisassat pillugit qularuteqassaguit Inuussutissarsiornermut, Suliffeqarnermut, Niuernermut Nukissiuuteqarnermullu Naalakkersuisoqarfik attaveqarfigisinnaavat.