Ujaruk

Imermik sermermillu avammut tunisineq

Kalaallit Nunaanni erngup tarajoqanngitsup isumalluuterujussuinit, nunarsuarmi erngup tarajoqanngitsup isumalluutaanit tamarmiusumit sermersuaq kisimiilluni 7 %-it missingalugu, sermermik imermillu avammut tunisisarnermut periusissiamik nutaamik Naalakkersuisut 2017-imi saqqummiussaqassapput.

Periusissiami qitiusutut inassutaani marluk ilaatigut tassaapput akitsuusersuisarnermut ilusiliaq nutaanngorsagaq, aammalu katersuinermut attaveqarfinnullu naleqqiullugit tulluartunik maqitsisarfissanik toqqaasoqarnissaq. Sumiiffinnik tulluartunik toqqartuinissamik suliaq aallartinneqareerpoq.

Kalaallit Nunaannit imermik avammut tunisinissaq soqutigissagukku sioqqutsisumik misissuinissamut akuersissut pillugu qinnuteqarsinnaavutit. Taassuma akigaa 1.000 kr.

Aamma avammut tunisinissamik siunertalimmik erngup atugarinissaanut akuersissut pillugu qinnuteqarsinnaavutit. Taakku nunami sumiiffinnut kisermaassisinnaatitaaffeqartillugit, imartamili sumiiffinnut kisermaassisinnaatitaaffeqarsinnagit tunniunneqartarput. Atuinissamut akuersissutip akigaa 10.000 kr., atuinerlu aallartissinnaalersinnagu suliffeqarfiup sulianik ingerlataqarnissamut tamarmiusumut pilersaarummut, aamma suliamik ingerlataqarnerup unitsinnissaanut pilersaarummut akuersissut pissarsiareqqaarsimassavaa. Akuersissutip taassuma akigaa 50.000 kr.

Sermermik imermillu avammut tunisinissamut akuersissut pigigukku royaltymik akiliuteqarnissamut immersugassaq attusavat.