Ujaruk

Nioqqutissiorfinnut tapiissutit

2020-imut Aningaasanut inatsimmi konto pingaarneq 64.10.34 tunngavigalugu tunisassiorfinnik nunaqarfinni isorliunerusunilu ingerlatsinernut tapiissuteqartoqarsinnaavoq.

Suliffeqarfiit soqutiginnittut uunga qinnuteqaammik nassiussisinnaapput:

Inuussutissarsiornermut, Nukissiuuteqarnermut, Ilisimatusarnermut Suliffeqarnermullu Naalakkersuisoqarfik
Postboks 1601
3900 Nuuk

Email: isiin@nanoq.gl  
Oqarasuaat: 34 50 00
Telefax: 34 63 64

1. Qinnuteqarnermi periaaseq

Suliffeqarfiit soqutiginnittut qinnuteqaammik pisariaqartut ilanngussat ilanngullugit (tak. imm. 4) uunga nassiussisinnaapput: Inuussutissarsiornermut, Nukissiuuteqarnermut, Ilisimatusarnermut Suliffeqarnermullu Naalakkersuisoqarfik.

Qinnuteqartumit imaluunniit sumiiffinnit allanit ilassutitut paasissutissanik pissarsiornissaminut Inuussutissarsiornermut, Nukissiuuteqarnermut, Ilisimatusarnermut Suliffeqarnermullu Naalakkersuisoqarfik imminut pisussaatippoq. Paasissutissat taama ittut qinnuteqaatip tamakkiisumik suliarineqarneranut ilaatinneqassapput.

Qinnuteqaatit tiguneqartartut ingerlaavartumik suliarineqartarput piffissami periarfissaqartitsiviusumi (2020). Tassa imaappoq, aalajangersimasumik qinnuteqarnissamut piffissaliisoqanngilaq.

Qinnuteqaat akuerineqarpat suliffeqarfik pineqartoq attavigineqassaaq, taamaalineranilu Inuussutissarsiornermut, Nukissiuuteqarnermut, Ilisimatusarnermut Suliffeqarnermullu Naalakkersuisoqarfiup suliffeqarfiullu akornanni kiffartuussinermut isumaqatigiissusiortoqassaaq.

2. Sunut tapiissutit qinnutigineqarsinnaappat

Tunisassiorfinnut tunngatillugu tapiissutinik qinnuteqartoqarsinnaavoq, siunertaralugu aalisarnermi aamma piniarnermi suliffissaqartitsinerup ingerlatsinerullu siuarsarneqarnissaat, kiisalu aamma nunaqarfinni isorliunerusunilu nioqqutissiorneq.

Nioqqutissiorfinnut tapiissutinik qinnuteqartoqarsinnaavoq ullorsiutit ukiuannut 2020-imut.

3. Atugassarititaasut

Kiffartuussinermik isumaqatigiissuteqarneq nioqqutissiorfinnut tapiissutinik tunngavilimmik piumasaqaateqarfiusarpoq suliffeqarfimmut atugassarititaasunik aalajangersimasunik:
• Pisussaaffeqarneq akuttunngitsumik suliniutip siuariartorneranik nalunaarusiortarnermik.
• Pisussaaffik suliffeqarfiup ukiumoortumik naatsorsuutaanik piffissamut isumaqatigiissuteqarfiusumut nassiussaqartarnissamik.
• Pisussaaffik Inuussutissarsiornermut, Nukissiuuteqarnermut, Ilisimatusarnermut Suliffeqarnermullu Naalakkersuisoqarfiup qinnuteqaammut aamma kiffartuussinermut isumaqatigiissummut atatillugu saaffiginnissutaanut akissuteqartarnissamut.
• Isumaqatigiissummi aalajangersakkanik naleqqussaanissamut atugassarititat.
• Kiffartuussinermut isumaqatigiissutip atorunnaarsittarnerani atugassarititaasut, taanna naammassineqanngippat (unioqqutinneqarpat) imaluunniit suliffeqarfik akiliisinnaajunnaarluni atorunnaarsinneqarpat assigisaanilluunniit pisoqarpat.

4. Qinnuteqartumut qinnuteqaammullu piumasaqaatit

Qinnuteqaammut tapiissutinik aningaasaliisoqartinnagu qinnuteqartumut qinnuteqaammullu arlalinnik piumasaqaateqartoqarpoq.

4.1. Qinnuteqartumut piumasaqaatit
Ingerlatsinermut aningaasaliissutinik pissarsinissamut qinnuteqartumut suliffeqarfik piumasaqaatinik makkuninnga naammassinnissimassaaq:

• Ingerlatseqatigiiffik Kalaallit Nunaanni angerlarsimaffeqassaaq
• Ingerlatseqatigiiffik nammineq aningaasaatigisaminik tamakkiisumik atuisinnaassaaq, taamaalillunilu akilersuinerminik unititsisimassanani, akiliisinnaajunnaarsimassanani, imaluunniit taakkununnga assingusumik inissisimassanani.

4.2. Qinnuteqaammut piumasaqaatit
Tapiissutitut aningaasaliissutinik pissarsinissamut qinnuteqaat minnerpaamik paasissutissanik makkuninnga imaqassaaq:

  • Suliffeqarfiup aqqa, najugaa attaveqarnissamullu paasissutissat
  • Suliffeqarfiup CVR-normua
  • Naatsorsuutinik kukkunersiorneqarsimasunik nassiussaqarnissaq, imaluunniit suliffeqarfinnut nutaanut suliassanut pilersaarummik tamakkiisumik nassiussaqarnissaq
  • Siulersuisut aamma piginnittut pillugit paasissutissat tamakkiisut
  • Piffissamut qinnuteqarfiusumut aningaasartuutissanut missingersuusiat

5. Tapiissuteqarnissamut tunngavigineqartussat

Atugassarititaasut tulliuttut tunngavigineqassapput qinnuteqaatit tiguneqartut nalilersorneqartarneranni. Qinnuteqaatit naliliivigineqartut tapiissuteqarnissamut tunngavissarititaasunik naammattumik naammassinnittut tapiiffigineqassapput.

  • Suliniutip suussusia aamma annertussusia
  • Ilassutitut tunitsivimmi sulisorineqalersussatut naatsorsuutigisat amerlassusaat
  • Qinnuteqartup misilittagai aamma qanoq ilisimasaqassusia
  • Ingerlatsivimmi ingerlatsiniarnerup annertussusissaa
  • Nalilersuineq nunaqarfimmi/illoqarfimmi pineqartumi allatigut suliffissanik periarfissat qanoq ittuunerinik.