Ujaruk

Tunisassiorfimmut tapiissutit

2021-imut Aningaasaqarnermut inatsimmi, nunaqarfinni aamma isorliunerusuni tunisassiorfinnut tapiissutissiissutissatut atorneqarsinnaasunik konto-mi pingaarnermi 64.10.34-mi aningaasaliinissamik akuersinermik immikkoortitsisoqarsimavoq.

Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik atsioqatigalugu kiffartuussinissamik isumaqatigiissutikkut nunaqarfinni isorliunerusunilu tunisassiorfinnut tapiissutinik tunniussisoqarsinnaavoq. Piumasaqaatit aamma qinnuteqarnissamut periusissiat ataani ersersinneqarput. 

Aalisarnerup aamma piniarnerup iluani, kiisalu nunaqarfinni aamma isorliunerusuni tunitsivinni tunisassiornissamut, suliffissaqartitsinermik- aamma ingerlataqarnermik killiffimmik siuarsaanissaq aamma qulakkeerinissaq siunertaralugu, tunisassiorfinnut tapiissutinik qinnuteqartoqarsinnaavoq.

1. Qinnuteqarnissamut periusissiaq

Suliffeqarfiit soqutiginnittut attuumassutilinnik ilanngussanik ilalerlugit (takujuk imm. 3) qinnuteqaammut immersugassaq immersugaq nassiutissavaat uunga

Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik.

Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik qinnuteqartumiit imaluunniit allaniit ilassutitut paasissutissanik pissarsiniarnissamut pisinnaatippoq. Paasissutissat taamaattut qinnuteqaammik suliarinninnermik katitigaasumut ilaassapput.

Piffissarititani assigiinngitsuni qinnuteqaatit takkussuuttut suliarineqassapput aamma piffissarititat immikkut tamarmik, agguaanneqarsinnaasunik, aningaasanik annertuussusilikkanik imaqarput. Piffissarititaasup ataasiakkaap naalernerani qinnuteqaatit suliarineqarfigisaat, qaqugukkut qinnuteqaatit suliarineqartartut aningaasaliissutigineqartussallu, piffissarititaasuni ataasiakkaani tunniunneqarsinnaasut, annertussusaat, tulleriiaarlugit allattukkani tulliuttuni, piffissarititanut ataasiakkaanut qinnuteqarnissamut piffissaliussat ersersinneqarput:

Piffissarititaq

Qinnuteqarnissamut piffissaliussaq

Qinnuteqaatip suliarineqarfia qaammat

Piffissarititami tunniunneqartut aningaasat annertussusaat

1.

28. februar 2021

Marts 2021

1.115.000 kr.

2.

31. maj 2021

Juni 2021

557.500 kr.

3

31. august 2021

September 2021

557.500 kr.

4.

31. oktober 2021

November aamma december 2021

Sinneruttut

Piffissarititami tunniunneqanngitsut aningaasat annertussusaat sinneruttoq, piffissarititamut tulliuttuusinnaasumut nuunneqarsinnaavoq.

Qinnuteqaat akuerineqarpat, suliffeqarfik pineqartoq attavigineqassaaq, taamalu Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfiup suliffeqarfiullu attuumassuteqartup akornanni kiffartuussinissamik isumaqatigiissummik inaarisoqassaaq.

2. Piumasaqaatit

Tunisassiorfimmut tapiissutit tunuliaqutaralugit atsiorneqartoq kiffartuussinissamik isumaqatigiissut, suliffeqarfimmut nalinginnaasumik atugassarititaasunik aamma piumasaqaatinik arlalinnik imaqarpoq, ilaatigut makkuusunik:

  • Pilersaarusiap siuariartuaarneranik akuttoqatigiissumik nalunaaruteqartarnissamut pisussaaffik
  • Suliffeqarfiup isumaqatigiissummut piffissarititaasumut ukiumoortumik naatsorsuutinik nassiussisarnissaanut pisussaaffik
  • Qinuteqaat aamma/imaluunniit kiffartuussinissamik isumaqatigiissut pillugu Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfiup saaffiginnissutaanut akisarnissamut pisussaaffik
  • Isumaqatigiissummi aalajangersakkanik tulluarsaanissamut piumasaqaatit
  • Kiffartuussinissamut isumaqatigiissummik, taanna unioqqutinneqarsimappat imaluunniit suliffeqarfik akiliisinnaajunnaarpat imaluunniit assigisaanik pisoqartillugu, atorunnaarsitsinissamut piumasaqaatit.

3. Qinnuteqartumut aamma qinnuteqaammut piumasaqaatit

Qinnuteqaammut tapiiffiginninnissamut eqqarsaatiginnittoqalersinnagu, qinnuteqartumut aamma qinnuteqaammut arlalinnik piumasaqaateqarpoq. Uani qinnuteqaammut immersugassaq aaneqarsinnaavoq.

3.1. Qinnuteqartumut piumasaqaatit

Suliffeqarfik, tapiissutinik qinnuteqartoq, tulliuttunik piumasaqaatinik naammassinnissaaq:

  • Ingerlatseqatigiiffik Kalaallit Nunaanni angerlarsimaffeqassaaq
  • Ingerlatseqatigiiffiup pisuussutini tamakkiisumik atorsinnaassavai, taamaalillunilu akilersuisinnaajunnaarnermeeqqusaanani, akiliisinnaajunnaartuussanani imaluunniit tamatumunnga assingusunik pissutsinik atugaqaqqusaanani.

3.2. Qinnuteqaammut piumasaqaatit

Qinnuteqaat tapiiffigineqarnissamik eqqarsaatigineqassaguni minnerpaamik tulliuttunik paasissutissanik imaqassaaq:

  • Suliffeqarfiup atia, najukkatut sumiiffia aamma attaveqarfissatut paasissutissat
  • Suliffeqarfiup CVR-normua
  • Naatsorsuutit kukkunersiukkanik imaluunniit suliffeqarfinnut nutaajusunut, niuernissamut pilersaarusiaq tamakkiisumik nassiussisoqassaaq
  • Siulersuisut aamma piginnittut pillugit paasissutissat pissarsiarineqarsinnaasut tamaasa
  • Isumaqatigiissuteqarfigisamut piffissarititamut qinnuteqaataasumut missingersuutit

Uani qinnuteqarnissamut immersugassaq aaneqarsinnaavoq.

4. Tunniussinissamut piumasaqaatit

Qinuteqaatit takkussuuttut nalilernissaannut piumasaqaatit tulliuttut atorneqassapput. Tunniussinissamut piumasaqaatinik naammaginartumik naammassinnittutut naliligaasut qinnuteqaatit, aningaasaqarnermut inatsimmi akuerisaasunik tunniussassaqarpat, tapiissutinik tunineqassapput.

  • Pilersaarusiap suussusaa aamma annertuussusaa
  • Tunitsivimmi sulisussat amerlassusissaattut naatsorsuutigineqartut
  • Qinnuteqartup misilittagai aamma piginnaasai
  • Suliffeqarfimmi ingerlatsinerup annertussusissaa
  • Illoqarfimmi/nunaqarfimmi pineqartumi suliffissaqartitsinermik periarfissanik allanik peqarnersoq naliliineq.

5. Kontakt

Suliffeqarfiit soqutiginnittut qinnuteqaammik apeqqutinillu nassiussisinnaapput uunga:

Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik

Postboks 1614

3900 Nuuk

Email: pan@nanoq.gl

Oqarasuaat: 34 50 00