Ujaruk

Inuussutissarsiortunut ikiorsiissutissat ataatsimoortitat - Pilertortussanut katersat

Annertussusaat

Inuussutissarsiortunut ikiorsiissutissat ataatsimoortitat pingaarnertigut ataatsimoortitat immikkoortut marluupput:

  • ”Nukinginnartunut ataatsimoortitat”, akunnittarfiit, neriniartarfiit, aamma sullissinermik inuussutissarsiuteqartut aalajangersimasut assigisaasalu iluanni suliffeqarfinnut, taamaatitsinerit annertoorujussuit malitsigisaannik nukinginnartumik aningaasaqarnikkut unammilligassaqalereersunut aamma suliffeqarfinnut matunissamik pisussaaffilerneqartunut kiisalu takornarialerinermut suliffeqarfinnut, takornarialerinermik inuussutissarsiortunut Ingerlatassanut ikiorsiissutissat ataanni tapiiffigineqarnissamik qinnuteqartunut, sammitinneqartut.
  • ”Nalinginnaasumik inuussutissarsiortunut ataatsimoortitat”, inuussutissarsiutini suliassaqarfinni allani ajornartorsiutinik iluarsiiniarnermut atorneqarsinnaasut. 

Maannamuugallartoq nukinginnartunut ataatsimoortitanut 50 mio. koruunit aammalu nalinginnaasumik inuussutissarsiortunut ataatsimoortitanut 100 mio. koruunit atugassanngortinneqarput.

Taamaallaat aningaasanut inatsimmi aningaasaliissutinik atugassiissutigineqanngitsunik atugassaqarpat tapersiissuteqartoqarsinnaavoq.

Malittarisassat

Inuussutissarsiortunut ikiorsiissutinut malittarisassat 1. juni 2020-imeersut

1. juni 2020 takornariartitsisarnermik inuussutissarsiortunut ingerlatassanut ikiorsiissutissat pillugit malittarisassat

Suliffeqarfiit

Suliffeqarfiit namminersortut Kalaallit Nunaanni nalunaarsorsimasut kisimik pineqartunut ilaatinneqarput, aktiaatileqatigiiffiit pisortanit pigineqartut arlaannaalluunniit pineqartunut ilaatinneqanngillat.

Aaqqissuussineq aamma peqatigiiffinnut, aningaasaateqarfinnut aamma ingerlatsivinnut imminnut pigisunut il.il. atuuppoq, taakkua nalinginnaasumik ingerlatsinermut aningaasartuutimi affaannit annikinnerusut pisortanit tapiissutitut pisarpatigit, aammalu anguniagaasoq pingaarnerusoq tassaappat inuussutissarsiornermik ingerlatsineq sinneqartooruteqarnissamik siunnerfeqartoq.

Taamaattoq sullissinerit kiffartuussinissamut isumaqatigiissut, ingerlatsinissamut isumaqatigiissut assigisaaluunniit aqqutigalugu tapiiffigineqartanngippata, takornariartitsinermik inuussutissarsiortunut Ingerlatassanut ikiorsiissutissat suliffeqarfinnit namminersortunit pigineqartunit aammalu suliffeqarfinnit pisortanit pigineqartunit atorneqarsinnaapput.

Suliffeqarfiit inummit namminerisamik pigineqartut sulisoqanngitsullu, taamaallaat qinnuteqarsinnaatitaapput qinnuteqartup pingaarnertut isertitai namminersorluni ingerlatsinikkut sinneqartoorutiniit pisarpata.

Suliffeqarfiup sulisuisa amerlanerpaartaat Kalaallit Nunaanni najugaqartuussapput.

Tapiissutit tunniunneqartut Akileraartarnermut Aqutsisoqarfimmut nalunaarutigineqassapput.

Tapiissutit akileraaruteqaataasussaapput, suliffeqarfiullu aningaasarsiaanut nalinginnaasunut ilanngullugit, akileraartarnermi maleruagassat atuuttut naapertorlugit nammineerluni nalunaarutigineqartussaallutik

Qinnuteqartoq, pisortaatitat aamma siulersuisut

Qinnuteqartoq imaluunniit direktionimi oqartussaasoq inuk imaluunniit siulersuisut akileraartarnermut inatsisinik annertuutigut unioqqutitsisimasuussanngillat, imaluunniit Kalaallit Nunaanni pinerluttulerinermut inatsit naapertorlugu aningaasarsiornikkut pinerluuteqarsimasuussanatik

Piffissaq

Nukinginnartunut ikiorsiissutit imaqarpoq aningaasaqarnikkut taartsisiassanik aaqqissuussinermik aamma suliffeqarfiit namminersortut aningaasanik attartorsinnaanerannut periarfissamik piffissami 1. marts 2020-imiit 30. september 2020-imut.

Ikiorsiissutissat qinnutigineqartarput, naatsorsorneqartarput tunniunneqartarlutillu qaammatit ilivitsukkaartumik, qinnutigineqarsinnaallutillu 1. marts 2020 aallarnerfigalugu. Taamaattoq marts-i qaammat eqqarsaatigalugu qinnuteqartoqarsinnaavoq, naatsorsuisoqarluni tunniussisoqarlunilu ikiorsiissutinik 15. marts -imiit qaammatip sinneranut.

Piffissami 1. juni - 30. september 2020 qaammatisiutit malillugit qaammatikkaartumik tapersiivigineqarnissaq qinnuteqaatigineqarsinnaavoq, naatsorsuisoqarsinnaalluni tunniussisoqarsinnaallunilu, aammalu ulloq 1. juni 2020 aallarnerfigalugu qinnuteqaatigineqarsinnaalluni. Qaammatip pineqartup aallartinneraniit qaammatip tulliata naanera tikillugu qaammammut aalajangersimasumut qinnuteqartoqarsinnaavoq.

Aaqqissuussinernut allanut ataqatigiissitsineq

Aaqqissuussinerit akulerullugit atorneqarsinnaapput, kisiannili marloriaammik matussutissarsisoqarsinnaanngilaq, pisortat ikiorsiissutinik aaqqissuussinerisa assigiinngitsut akornanni, tamatumani inuussutissarsiortunut ikiorsiissutit, akissarsianut aningaasartuutsinut taartsisiassat allalluunniit pineqaraluarpata. Qinnuteqartoq pisussaaffeqarpoq tamanna pillugu ilisimatitsinissamik, qinnuteqartoq aaqqissuussinerit ilaanniit allamit ikiorsiissutisisimaguni.

Annerpaamik suliffeqarfimmut ataatsimut 1 mio. kr.-inik qaammammut tapiissuteqartoqarsinnaavoq inuussutissarsiutinut ikiorsiissutinit tamarmiusuniit, tamatumani aamma ingerlatassaraluanut taamaatinneqartunut taartsisiaqarnikkut, suliffeqarfiup aalajangersimasunik aningaasartuutaanut taartsisiaqarnikkut aammalu ajornartoornermi akisussaassuseqartunik Aningaasanik attartornikkut. Qaffasinnerpaamik ikiorsiissutaasinnaasut 1 mio. kr.-it aamma qaffasinnerpaanik ataatsimut akiliutissaapput suliffeqarfinnut tamanut, suliffeqarfinnut ingerlatseqatigiiffikkoortumik ataqatigiittunut, suliffeqarfinnut ingerlatseqatigiiffikkoortumik ataatsimoortunut malittarisassat atuuttut naapertorlugit aamma suliffeqarfiit Kunngip peqqussutaanik tunngaveqartumik aktiaatileqatigiiffinnut piginneqatigiiffinnullu inatsit atortuulersinneqarsimasoq naapertorlugu (ingerlatseqatigiiffinnut inatsit), toqqaannartumik toqqaannanngitsumilluunniit piginnittuinnit pigineqartunut.  

Aningaasanut killiliussaq atuuppoq ingerlatseqatigiiffinnut marlunnut arlaqarnerusunulluunniit inuussutissarsiutit sammivianni ataatsimi aamma /imaluunniit inuussutissarsiutini imminnut qanitariittuni, ingerlatseqatigiiffiup ataatsip imaluunniit qanitaata toqqaannartumik imaluunniit toqqaannanngitsumik ingerlatseqatigiiffiup aningaasaataasa ilaat annertuut pigisarippagit, imaluunniit ingerlatseqatigiiffiit arlariit aningaasaataat toqqaannartumik toqqaanngitsumilluunniit inummit ataatsimit pigineqarpata, imaluunniit ingerlatseqatigiiffimmit pigineqarpata, imaluunniit inunnit imminnut qanitariittunit ingerlatseqatigiiffinnilluunniit pigineqarpata, akiliisinnaajunnaarluni ingerlatsinermik unititsiinnartarneq pillugu peqqussummi Kalaallit Nunaanni atortuulersinneqarsimasumi aalajangersakkat naapertorlugit.

Inuk ataaseq taartsisiassanik pissarsiaqarsinnaanngilaq toqqaannartumik pisussanik taamaatitsinernut aningaasaliissutaasinnaasutut aalajangersagaasut avataasigut, naak inuk pineqartoq suliffeqarfinni arlariinni piginnittuugaluartoq, aaqqissuussinermi piumasaqaataasunik naammassinnittunik.

Naalakkersuisut tamanna pillugu ersarinnerusunik malittarisassiorsinnaapput aammalu tamanna pillugu aalajangersimasunik aalajangersaasinnaallutik.

Naalakkersuisut pisinnaatipput tapiissutit utertinneqarnissaannik piumasaqarsinnaanermik, aalajangersakkat atugassarititaasullu eqqortinneqarsimanngippata, neriorsuuteqarnermi pineqartumi imaluunniit tapiissuteqarnermi aalajangersimasumi.

Toqqaannartumik taamaatitsinernut taartisiassat

Suliffeqarfiit pineqartunut ilaatinneqartut ilai toqqaannartumik taamaatitsinernik misigisaqarput, suliffeqarfiit allat kaaviiaartitat toqqaannannginnerusumik taamaatitsinernit sunnerneqarlutik, assersuutigalugu COVID-19-ip siaruarnissaa pitsaaliorniarlugu isumannaallisaanermi iliuusissanit atuutsinneqalersunit eqqorneqarlutik.

Suliffeqarfiup COVID-19-ip malitsigisaanik minnerpaamik 30 %-imik kaaviiaartitanik annaasaqarnissaq naatsorsuutigissavaa.

Toqqaannartumik taamaatitsinerni ilaatinneqarput akunnittarfimmi unnuinissanik taamaatitsinerit, imaatigut angalaarnissat taamaatinneqartut il.il., tassani ingerlatassat taamaatinneqartut aalajangersimasut suliffeqarfiup uppernarsarsinnaassallugit. Toqqaannartumik taamaatitsisoqartillugu, taamaatitsinermi kaaviiaartitassat annaaneqartut uppernarsarneqarnerat tunngavigalugu, taartisiassat taamaatitsinerup pineraniit tunniunneqarsinnaapput

Taartsisiassat qaammatikkaartumik  akilerneqassapput. Taakkua kaaviiaartitassat annaaneqartut uppernarsarneqartut 75 %-iinut matussusiissapput, taamaattoq qaammammut annerpaamik 23.000 koruuniussallutik imaluunniit katissimallugu aapparisaq atorfeqartinneqarsimappat qaammammut annerpaamik 46.000 koruuniussallutik, taamaattoqarpat aappaasumut tunngatillugu taartisiassanik qinnuteqartoqarsinnaanngilaq).

Assersuut: Sanasunut mesteri

Takornarialerinermut suliffeqarfiup namminersortup 40.000 kr. i piffissami 24. marts - 24. maj corona-virus-ip malitsigisaanik qaammammut 40.000 koruuninik kaaviiaatitamini annaasaqarnissani naatsorsuutigaa. Suliffeqarfimmut qaammammut kaaviiaartitat 2019-imut ukiumut naatsorsuusiorfiusumut agguaqatigiissillugu 100.000 koruuniupput. Taamaalillutik kaaviiaatitani annaasat 40 %-inut naapertuupput.

Taamaattumik suliffeqarfik taartisiassanut aaqqissuussinermi 24. maj tikillugu Namminersorlutik Oqartussaniit qaammammut 23.000 koruuninik taartisiassaqassaaq, qaammammut annerpaamik taartisiassanut naapertuuttunik. Taamaalilluni suliffeqarfik pisumi immikkorluinnaq ittumi tassani pilersuinermut tunngavissaminik attassiinnarnissamut periarfissarissaarnerulissaaq.

Suliffeqarfiit aningaasartuutaannut aalajangersimasunut taartisiassat

Suliffeqarfiit matumani ilaasut ilaasa misigisarpaat toqqaannartunik pisussanik taamaatitsisarnerit, suliffeqarfiilli allat kaaviiaartitaat toqqaannartuunngitsunik taamaatitsinernit sunnerneqartarlutik, assersuutigalugu tamakku sillimaniarnikkut aaqqissuussinernik peqquteqartunik eqqugaasut, COVID-19-ip siaruartersinnaaneranik pinaveersaartitsinernut atatillugu.

Suliffeqarfiup COVID-19-ip malitsigisaanik minnerpaamik 30 %-imik kaaviiaartitanik annaasaqarnissaq naatsorsuutigissavaa.

Taartisiassat suliffeqarfiup isumaqatigiissuteqarluni aningaasartuutaasa pisussaaffiusut (aningaasartuutit aalajangersimasut) 25 – 80 %-iinut matussusiissaaq.

Taamaattoq suliffeqarfiit, COVID-19-p tunillaassuulluni siaruariartornissaa pitsaaliorniarlugu ingerlatsinissaannik Naalakkersuisut inerteqquteqarfigigallarsimasai, piffissamut inerteqquteqarnerup atuuffianut aningaasartuutaasa aalajangersimasut pineqartunut ilaatinneqartut 100 %-iitut annertussusilimmik taartisiaqartinneqassapput.

Taartisiassat annerpaamik qaammammut suliffeqarfimmut ataatsimut 1 mio. koruuninik annertussuseqarsinnaapput.

Aalajangersimasunik aningaasartuutinut ilaapput ininik attartornernut akiliutissat, ernianut aningaasartuutit aamma isumaqatigiissutigisimasanut (kontraktinut) atorunnaarsinneqarsinnaanngitsunut aningaasartuutit piffissami aalajangersimasumi (assersuutigalugu leasing, kisianni pinnagit aningaasartuutit aaqqissuussinernut allanut matussutaasussat (assersuutigalugu akissarsianut). Naatsorsuutini oqimaaqatigiissitsissutit, assersuutigalugu aningaasanut attartukkanut akilersuutit, nalikilliliinerit aamma pisussaaffinnut immikkoortitat, aalajangersimasumik aningaasartuutitut paasineqartanngillat.

Aammattaaq taartisiassat aningaasartaannik naatsorsuinermut tunngatillugu takuuk 1. juni 2020 inuussutissarsiortunut ikiorsiissutissat pillugit malittarisassat.

Assersuut: Neriniartarfik

Neriniartarfimmik piginnittoq inerteqquteqarallarnerup malitsigisaanik neriniartarfimmini neriartortunik nerisitsisinnaanngilaq, kisianni take away aqqutigalugu nalinginnaasumik kaaviiaartitami 41 % -inik tunisaqaannarsinnaalluni. Neriniartarfimmi kaaviiaartitat 59 %-imik appartut misigineqarmat, taanna aningaasartuutimi aalajangersimasut taartisiffigineqarsinnaatitaasut 25 %-iinik taartisisinnaavoq:

Qaammammut aningaasartuutit aalajangersimasut:

  • Qaammammut ineqarnermut akiliut: 18.000 kr.
  • Avataaneersumut assartuussinermut suliffeqarfimmut isumaqatigiissut: 5.000 kr.
  • Igaffimmi pequtinut akiitsunut ernianut aningaasartuutit: 4.000 kr.
  • Katillugit: 27.000 kr.

Taartisiassat: 6.750 kr. (27.000 koruunit 25 procentiisut annertussusillit).
 

Akisussaassusilimmik ajornartoornermi taarsigassarsiat

Aningaaseriviit aqqutigalugit naalagaaffimmit qularnaveeqqusiivigineqartumik aaqqissuussinermik neqeroortoqarsimanngippat, inuussutissarsiortunut ikiorsiissutissat ataatsimoortitat killissaasa iluanni akisussaassusilimmik taarsigassarsianut aaqqissuussineq neqeroorutigineqarsinnaavoq.

Suliffeqarfiup COVID-19-ip malitsigisaanik minnerpaamik 30 %-imik kaaviiaartitanik annaasaqarnissaq naatsorsuutigissavaa.

Taarsigassarsiat taartisiassanut aaqqissuussinerit matuma siuliani allassimasut arlaannut ataqatigiissillugit neqeroorutigineqarsinnaapput.

COVID-19 ajornartorsiortitsinerata maannakkut pisup anigornissaanut aammalu ajornartorsiornerup qaangiunnerani siumut ingerlaqqilernissamut, suliffeqarfimmi aningaasaateqarnissap qulakkeernissaa siunertaralugu, taarsigassarsititsinissaq neqeroorutigineqarsinnaavoq. Attartukkat atorneqaqqusaanngillat ineriartortitsinermut siunertanut aningaasaliissutitulluunniit, aamma atorneqaqqusaanngillat aningaasanut siusinnerusukkut aningaaserivimmi attartukkanut matussutissatut, kreditforening-ini attartukkanut imaluunniit ingerlatseqatigiiffinni peqataanernut.

Taarsigassarsiarititat qaammatit 36-it angullugit taarsersugassaassanngillat tamatumalu kingorna attartukkat akilerneqassallutik. Taarsigassarsiarititat annertussusilerneqarneranni, piffissami nukinginnartunut ataatsimoortitat matussusiivissaanni unammilligassat aalajangersimasut sillimaffigineqassapput, taamaattoq annerpaamik 1.000.000 koruuniussallutik suliffeqarfikkaartumik qaammammut. Ataasiakkaani atugassarititaasut, suliffeqarfinnut ataasiakkaanut tamaginnut, ataasiakkaatut isumaqatiginninniutigineqartassapput. (takuuk www.innovation.gl).

Assersuut: Takornarianik imaatigut angallassineq

Takornariartitsinermut suliffeqarfiup minnerusup, ikittukkaanik takornarianik imaatigut angallassisartup, isertitaminut tunngavigisani tamakkerlugit annaasimavai, tassami qaammatini arlalinni angallanneqartussanik ataasinnguamilluunniit takornariaqarsimanngimmat. Maajip qaammataani angalanissat inniminnerneqareersimasut taamaatinneqarsimapput, kisianni suliffeqarfik qanittumi umiatsiamut angallatigisaminut aningaasaleeqqammerluni, aammalu suli tassunga akiitsuminut akilersuilluni.

Suliffeqarfiup kaaviiaartitaminut annaasaminut taartisiassani, aningaasat annerpaaffissaattut annertutigisut, tigoreersimavai, kisianni umiatsiaminut suli akilersuisussaalluni, kinguartinneqarsinnaanngitsunik.

Suliffeqarfik aningaaserivimmi akilersugassani pingasut pisussat akilersinnaajumallugit 30.000 koruuninik akisussaassusilimmik ajornartoornermi taarsigassarsivoq, taamaalilluni suliffeqarfiup akilersugassani taakkua ukiuni 3-ni kinguartillugu, periarfissiisumik suliffeqarfiup aaqqiissutissarsiniarnissaanik, taamalu kingusinnerusukkut ilassutitut akiligassanik akiliisinnaalerumallugu aaqqissuussilluni.

Allaffissornikkut aqutsineq

Aaqqissuussinerit allaffissornikkut aqunneqarnerat Greenland Business A/S-imit  ingerlanneqassaaq. Pisortat ingerlatsineranni suliassat suliarineqartarnerat pillugu Inatsisartut inatsisaat aamma pisortat ingerlatsinerat pillugu paasitinneqarsinnaatitaaneq pillugu Inatsisartut inatsisaat, suliassamik suliarinninnermi atuupput.

Suliassanik suliarinninnerup assigiissaarnissaa sukkasuumillu pinissaa qulakkeerniarlugu, internettikkut qinnuteqarnermi immersugassat suleriaatsillu atorneqarput.

Qinnuteqaat

Qinnuteqarneq elektroniskimik qinnuteqarnermi immersugassaq immikkuullarissoq, Greenland Business-imit aqunneqartoq, atorlugu pissaaq.

Qinnuteqarniaraanni suliffeqarfik Greenland Business-ip qinnuteqaatinut periaasiani ilisarnaatissaminik pilersitsissaaq, tamatuma kingorna immersugassaq pineqartoq aallaavigalugu qinnuteqaasiorsinnaalluni. LINK-i

Naammagittaalliorneq

Greenland Business A/S-ip aalajangiineri Inuussutissarsiornermut, Nukissiuuteqarnermut, Ilisimatusarnermut Suliffeqarnermullu Naalakkersuisoqarfimmut naammagittaalliuutigineqarsinnaapput