Ujaruk

Ujarassiorit – Nalinginnaasumik paasissutissiineq peqataanerlu pillugit

Aatsitassanik ujarlerneq imaluunniit Ujarassiorit Kalaallit Nunaanni aatsitassanik ujaasinermik unammisitsinermut nuannarineqarluartumut taaguutaavoq. Kikkut tamarmik Kalaallit Nunaanni najugallit ujaqqanik pinngortitami nassaarineqartunik misissugassanngortillugit nassitsisinnaapput, taakkulu Inuussutissarsiornermut Aatsitassasiornermut Suliffeqarnermullu Naalakkersuisoqarfimmi Ujarassiornermik Immikkoortortaqarfimmut misissortillugit. Misissukkat soqutiginaateqarnerpaat ukiut tamaasa akissarsiassaqartinneqartarput.

Inuussutissarsiornermut Aatsitassaqarnermut Suliffeqarnermullu Naalakkersuisoqarfik unammisitsinermik ingerlatsisuuvoq, aamma ataatsimiititaliami dommer-it Inuussutissarsiornermut Aatsitassasiornermut Suliffeqarnermullu Naalakkersuisoqarfimmi aamma Danmark-imut Kalaallillu Nunaannut  Naalagaaffik tamakkerlugu Aatsitassanik Misissuisarfimmi (GEUS) ujarassiuunik ilaasortaqarput.

Ujarassiorit 1989-imi aallartinneqarpoq maannalu Kalaallit Nunaanni ileqquulersimalluni. Ujarassiorit innuttaasut aatsitassanik najukkaminni piusunik ilisimasaqalernissaannik soqutiginnilernissaannillu aamma tunniussivoq. Tassunga ilutigitillugu innuttaasut najukkaminnik ilisimasaqarnerat ujarassiuunut iluaqutaavoq. Pisuni arlalinni ujaqqanik misissorneqartussanik nassiussinerit aamma nunani allani suliffeqarfiit Kalaallit Nunaanni aatsitassanik misissuinerminnik aallartitsinerannut tunngaviusimapput.

Ujarassiorit-mut misissugassanik nassitsineq akeqanngilaq. Nunatta allakkeriviini tamani nassiussinermut atortunik tunniussisoqarsinnaavoq taavalu misissugassaq pigineqartoq nassiussinissamut aki akilerneqarsimasoq atorlugu nassiullugu.

Misissugassaq Inuussutissarsiornermut Aatsitassasiornermut Suliffeqarnermullu Naalakkersuisoqarfimmi ujarassiuumit misissorneqassaaq, aamma misissugassap aatsitassanik sunik akoqarnera pillugu paasissutissanik imalimmik nassiussisoq allagarsitinneqassaaq. Misissugassat immikkut soqutiginarsinnaasut misissuiffimmut misissugassanngortillugit nassiunneqartarput. Misissuinerit inerneri piareeraangata, misissukkat akissarsitinneqartussat toqqarneqartarput.

Ujarassiorit pillugu uani annertunerusumik atuagaqarsinnaavutit www.ujarassiorit.gl


Peqataanissamut malittarisassat
  • Kalaallit Nunaanni inunnik nalunaarsuisarfimmi najugaqartutut allassimassaatit
  • Unammineq nuannariinnarlugu ujarlertartunut taamaallaat atuuppoq
  • Misissugassat nunatsinneersut taamaallaat nassiussinnaavatit. Misissugassat sumi nassaarineri eqqortumik nalunaarsukkat kisimik akissarsissutigineqarsinnaapput.
  • Misissugassanngortillugit nassiussat utertinneqarneq ajorput
  • Misissugassat ujaraqarfinnit ilisimaneqareersuneersut aatsaat paasissutissanik nutaanik tunniussisinnaappata akissarsissutigineqarsinnaapput
  • Kalaallit Nunaanni aatsitassat pillugit inatsit naapertorlugu nunaminertamik atuisinnaanermut akuersissuteqarfiusumi misissugassanik katersisinnaatitaanngilatit. Aamma kommune malittarisassaqarsimappat ilinnit malinneqassapput
  • Ujarassiorit-mut peqataanikkut Kalaallit Nunaanni aatsitassat pillugit inatsit naapertorlugu piginnaatitaaffimmik pissarsitinneqarsinnaanngilatit
  • Piffissaliussaq Misissugassaq pigisat oktober-ip aallaqqaataa nallertinnagu Aatsitassanut Pisortaqarfiup tigoreersimassavaa. Ima iliussaatit Ujaqqamik soqutiginartumik nassaaruit taannalu


Ujarassiorit-mut peqataatinniarukku, taava:


  1. Allakkerivimmut saaffiginnissaatit, tassani poortuutissamik tunineqarsinnaavutit, misissugassarlu akeqanngitsumik nassiullugu. Poortuutissaq immersugassiamik ilaqarpoq
  2. Immersugassiaq immersoruk atit, najukkat kiisalu sumerpiaq nassaarisimanerlugu allallugit. Nassaarfik najukkap pineqartup titartagartaanut nalunaaqutseruk
  3. Immersugassiaq misissugassamut ilanngullugu nassiunneqassaaq. Oktober-ip aallaqqaataa nallertinnagu Aatsitassanut Pisortaqarfimmit tiguneqarnissaa qulakkeerlugu nassiunneqassaaq. Misissortitassatit oktober-ip aallaqqaataata kingorna Aatsitassanut Pisortaqarfimmit tiguneqarsimappat, ukiumi tulliuttumi unammisitsinermut peqataatinneqartussatut ingerlatinneqassaaq