Ujaruk

Uumasunut Nakorsaqarfik Inuussutissalerinermullu Oqartussaaffik

Kalaallit Nunaanni Uumasunut Nakorsaqarfik Inuussutissalerinermullu Oqartussaaffik Namminersorlutik Oqartussani oqartussaaffiuvoq nunatsinni nerisassat isumannaatsuunissaannik, uumasunut nakorsaqartinnerisigut upalungaarsimanermik uumasullu atugarissaarnissaanik pingaarnertigut akisussaaffeqartoq

Nunatsinni uumasunut nakorsaqartitsinerup nerisassallu tungaasigut akisussaassuseqarneq Namminersorlutik Oqartussanit aamma Ministeriet for Fødevarer, Landbrug og Fiskeri Danmarkimit avillugu isumagineqarpoq.

Fødevarestyrelsen i Danmark suliffeqarfiit neqinik nerpinnillu suliaqartut akuersissutinik tunineqarnissaat nakkutigineqarnissaallu pillugit qullersaalluni oqartussaaffiuvoq, oqartussaaffinnullu ilaallutik angallassuit suliffiusut avammut niuernissamut akuerineqarsimasut.

UNIO-mit suliassaqarfiit makku isumagineqarput:

  •  Suliffeqarfiit nerisassalerinermik suliaqartut inuussutissanillu tunisassiortut - nunatsinnut tunisassiortut, akuersissuteqartarneq, ilitsersuineq nakkutilliinerlu.
  • Toqoraaviit - neqit suugaluartulluunniit nunatsinni tunisassatut naatsorsuussat misissorneqarneri (kalaalimineerniarfinni tuniniagassat kisiisa pinnagit).
  • Nerisassat isumannaatsuunissaat - upalungaarsimaneq, assersuutigalugu nerisassat tunineqarsinnaajunnaartut pillugit atuisunut paasissutissiinerit. Nappaatinik nerisassat aqqutigalugit tunillaassuussinnaasunik sumiissusersiuinerit, taakkununnga ilaalluni nunat tamalaani susassaqartunut nalunaarusiortarneq.
  • Uumasut atugarissaarnissaat uumasunillu illersuineq – nakkutilliineq ilitsersuinerlu. Uumasut tamarmik matumani pineqarput, Nunarput tamakkerlugu pingaartumik qimuttunik qimuttoqarfinni aammalu uumasunik illumiititanik kiisalu uumasuutigisanik nakkutilliineq.
  • Peqqinnissamik misissuinermik nakorsaatinillu ikiuineq - qimuttunut, qimminut savanik paarsisunut uumasuutinullu tunngatillugu.  Malugiuk UNIO-mi uumasut nakorsaasut uumasuutigisat nakorsartinnissaa neqeroorutigisinnaanngilaat.
  • Uumasut nappaataannut upalungaarsimaneq - uumasut nappaataannik nalunaarutigineqartussaatitaasunik nunat tamalaani susassaqartunut assigiinngitsunut nakkutilliinermik nalunaarusiornermillu nalunaaruteqarneq.
  • Zoonosit – zoonosinik (nappaatit uumasuniit inunnut tunillaassinnaasut) nakkutiginninneq, nalunaaruteqartarneq akiuiniarnerlu, soorlu trikinit perlerornerillu.
  • Inuit peqqissuunissaat -  nerisaqarneq pillugu siunnersuisoqatigiinnut, nappaatit tunillaattartut pillugit ataatsimiititaliamut peqataaneq -  Ship Sanitation Certificates-inik tunniussisartoq.
  • Peqqissutsimut uppernarsaatinik tammajuitsunullu uppernarsaatinik tunniussisarneq – UNIO Fødevarestyrelsenimit assersuutigalugu tammajuitsussanik annissuinermut atatillugu peqqissutsimut uppernarsaatinik tunniussinissamik piginnaatinneqarpoq.
  • Fødevarestyrelsen suleqatigalugu Danmarkimi kalaallit napparsimasut angerlarsimaffiannut nerisassanik annissuinerit.
  • Innuttaasunik sullissinerit - uumasut nerisassallu tungaasigut paasissutissiisarneq, taakkununnga ilaallutik, soorlu uumasunik angallassineq nerisassanillu eqqussuineq annissuinerlu.

Uumasunut nakorsaqarnerup inuussutissalerinerullu tungaasigut Namminersorlutik Oqartussat aamma Fødevarestyrelsenip akisussaanerup tungaatigut suleqatigiinnerat pillugu allanik atuarsinnaavutit uani.