Ujaruk

Inatsisiliorneq

Inatsisiliorneq Inuussutissarsiornermut Immikkoortoqarfik;

Suliniutini angisuuni illuliortiternermik sanaartornermillu suliassat pillugit Inatsisartut inatsisaat nr. 25, 18. december 2012-imeersoq

Inuussutissarsiorfiusup sinneranik aamma inuiaqatigiinni aningaasaqarnermik killup tungaanut sunniuteqartitsisussamik nalinginnaasumik akissarsiat aningaasartuutillu inissisimaffianik annertusaatitsinani suliniutit angisuut piviusunngortissinnaaneranik inatsit qularnaarivoq.

Inatsisip suliniutit angisuut imatut nassuiarpai:
- Suliniutit, sanaartornermi aningaasartuutit fem milliarder kroninik qinneqarfiusut
- Suliniutit, Kalaallit Nunaanni sulisartunik suliffissaaleqisunik pissarsiarisinnaasanillu qaangiisumik sanaartornermi suliat isumaginerini sulisartunik pisariaqartitsisoqarfiusut
- Suliniutit, sanaartornermik sulianik suliffeqarfinni teknikkikkut aningaasaqarnikkullu pisinnaassuseqarnissamut piumasaqaatit nunatsinni suliffeqarfiit teknikkikkut aningaasaqarnikkullu pisinnaassusaannik qaangiisoqarfiusut.

Inatsisaasumik allannguuteqarneq; Inatsisartut inatsisaat nr. 13 ulloq 29. november 2013 suliniutini angisuuni illuliortiternernik sanaartornernillu suliassat pillugit Inatsisartut inatsisaata allanngortinneqarnissaa pillugu (Sulisunut nunanit allaneersunut aningaasarsiat atorfeqarnermilu atugassarititaasut pillugit malittarisassat ersarissaavigineqarnerat allanngortinneqarnerallu, ataatsimoorussamik isumaqatigiissutit aammalu sulisunut pisinnaatitaaffiit atortinneqarnerat sulisartullu eqqartuussiveqarnerat eqqarsaatigalugit, il.il.)

Inatsisaasumik allannguuteqarnermut siunertaq tassaavoq suliniutinut angisuunut atatillugu atorfeqarnermi inatsisitigut malittarisassiat qanoq atorneqarnerinik aamma Kalaallit Nunaanni nunanit allanit sulisartunut ilassutigisatut aalajangersakkanik aalajangersaanerup erseqqissaaviginissaat. Inatsisaasumik allannguuteqarnerup siunertaraa pissutsit taakku pillugit annertunerusumik erseqqissuseqalersitsinissaq, aammalu pisortani oqartussaasunut, suliniutinik ingerlatseqatigiiffinnut, sulisartut aamma sulisitsisut kattuffiinut malittarisassianik suliaqarfeqarnerup najoqqutaqarnerullu oqilisaaviginissaat.

Sermip erngullu avammut nioqqutissatut atorneqarnissaat pillugu Inatsisartut inatsisaat nr. 7, 31. maj 2001-imeersoq (sermip erngullu avammut nioqqutiginissaannut inatsit)

Inatsit taamaallaat Sermip Erngullu avammut nioqqutiginerannut tunngasuuvoq – taamaalillunilu Kalaallit Nunaanni atuinissamut pilersuinermut ilaqarani. Inatsisip siunertaa tassaavoq misissueqqaarnermut atuinissamullu akuersissuteqarnissaq pillugu qinnuteqaateqarnermut atatillugu inuussutissarsiorfittut suliaqarfiup taassuma iluani malittarisassiornissaq.

Inatsisaasumik allannguuteqarneq; Sermip erngullu nioqqutissatut atorneqarnissaat pillugu Inatsisartut inatsisaata allanngortinnissaa pillugu Inatsisartut inatsisaat nr. 3, 15. maj 2014-imeersoq (sermip erngullu avammut nioqqutiginissaannut inatsit) (Oqartussaasut taaguutaannik aamma paasissutissat nalunaarutiginissaat pillugit malittarisassiat il.il. allannguutit)

Inatsisip siunertaraa sermip erngullu avammut nioqqutiginissaanut inatsisaasumi ilaasumi pissutsinut tunngasunik paasissutissanik allagaatinillu sermi erngullu avammut nioqqutigineranut oqartussaasoqarfiup aamma akileraartitsinermut oqartussaasoqarfiup pissarsiorsinnaanerannik qularnaarinissaq. Tamanna ilaatigut pisinnaatitsissummik piginnittup akitsuutinik (royaltynik), kiisalu akileraarutit sinnerinik akiliisarnerinik nakkutilliinikkut misissuinikkullu pissaaq.

Nalunaarutit: Sermip erngullu avammut nioqqutissatut atorneqarnissaat pillugu inatsit naapertorlugu oqartussatut suliarinnittarneq pillugu Namminersornerullutik Oqartussat nalunaarutaat nr. 7, 22. april 2004-meersoq

Sermip erngullu avammut nioqqutiginissaannut akuersissutisisinnaaneq sioqqullugu suliffeqarfimmut piumasaqaatinik nalunaarut erseqqissaavoq. Suliassaqarfimmut tassunga oqartussaasoqarfik sorleq sulianik isumagiinnittuusarnersoq, aammalu misissueqqaarnermut atuinermullu akuersissutinik tunniussinermi akitsuutit sorliit piumasarineqarsinnaanersut nalunaarutip nassuiarpai.

Uumassusillit isumalluutit niuernermi ilisimatusarnermilu atorneri pillugit Inatsisartut inatsisaat nr. 20, 20. november 2006-imeersoq

Inatsisip atorneqarfianiipput isumalluutinik uumassusilinnik ilisimatusarnikkut niuernikkullu atuinerit. Isumalluummik uumassusilimmik ilisimatusarnermut tunngatillugu atugaqarsinnaaniaraanni pisinnaatitsissummik peqartoqassaaq, niuernikkullu isumalluummik uumassusilimmik atuiniaraanni tamatumunnga akuersissummik peqartoqassaaq. Pinngortitami isumalluutinik nalinginnaasumik imaluunniit teknologiskiunngitsumik atuinernik inatsit ilaqanngilaq. Inatsit ileqquliussamik piniarnermi, aalisarnermi nunalerinermilu, imaluunniit pinnersaatissatut imaluunniit nerisassatut naasunik il.il. katersuinerni atugaanngilaq.

Sumiiffinni nunami aalajangersimasuni takornariartitsinermut akuersissuteqartarnissaq pillugu Inatsisartut inatsisaat nr. 19, 3. december 2012-imeersoq

Sumiiffinni nunami aalajangersimasuni takornariartitsinermut akuersissuteqartarnissaq pillugu Inatsisartut inatsisaat nr. 19, 3. december 2012-imeersup allanngortinnissaa pillugu Inatsisartut inatsisaat nr. 15, 3. juni 2015 (Inatsisip atuuffigisaa sukisaarsaatigalugu aalisarnermut akuersissutinut sumiiffikkaanullu pilersaarutinut piginnaatitsissummik ilaqartilerlugu annertusissaaq)

Inatsisip siunertaa tassaavoq erseqqinnerusumik aalajangersimasumi timitalittut sumiiffiusup iluani takornariartitsinermik tunisassiamik ataatsimik imaluunniit arlalinnik pilersuinissamut akuersissummik (kisermaassinermik) pissarsinissamut takornariartitsinermik inuussutissarsiuteqarfimut periarfissiinissaq. Inatsisikkut anguniagaq tassaavoq piffissamut ungasissumut ineriartortitsinermut sinaakkutissanik pilersitsinissaq, tassani takornariartitsisartut inuussutissarsiorfimmi pisariaqartitanik namminersuutigisanik aningaasaliiffeqarlutik – taamaaliornikkullu sulianik amerlanernik pilersitsillutik, annertunerusumik suliffeqartitsilerlutik najugaqarfimmilu siuarsarnermik pilersitsillutik.

Nunami inuussutissarsiutinut tunngatillugu inuussutissarsiornermik siuarsaaneq pillugu Inatsisartut inatsisaat nr. 20, 3. december 2012-imeersoq

Inatsisip siunertaa tassaavoq inuussutissarsiorfimmik siamasissumik, assigiinngisitaartumik namminerlu napatittumik siuarsaasunik suliniutinik tapersersuinertut ilusilinnik nunatsinni inuussutissarsiorfiusup ineriartortinneranik nukittorsaanissaq, aammalu suliniuteqartuusumut aamma nalinginnaasumik inuiaqatigiinnut aningaasaqarnikktu siuarsarnermut peqataaqataasinnaasumik. Sulianik aallartitaqartunik namminersuutigalugulu inuussutissarsiortuusunut tapersersuutissatut immikkut ittunik agguaassassanik pilersitsinissamik inatsit periarfissiivoq.

Tunisassianik ineriartortitsinermut, ingerlatanut avammut tuniniaanissamik siuarsaasunut, kalaallit nerisassiaannik atuinermik siuarsaasunut aamma inuussutissarsiutigalugu siunnersortinit ikiorneqarnissamut (kittaartagaq) tapersiissuteqartarneq pillugu Namminersorlutik Oqartussat nalunaarutaat nr. 3, 17. februaari 2014-imeersoq

Suliassaqarfiit sorliit tapiissutinik qinnuteqarfiusinnaanersut, aammalu qanoq annertutigisunik tapiissutissanik qinnuteqartoqarsinnaanersoq nalunaarutip erseqqissaavigai. Suliffeqarfiup aallartisarneranut, tunisassianik ineriartortitsinermut, kalaallit nerisassaataasa atornerinut, aamma avammut nioqquteqarnermik siuarsaasunik suliaqarisanut aningaasatigut tapiissutit pillugit namminersuutigalugu inuussutissarsiutillit qinnuteqarnissamut periarfissaqarfigisaat agguaassassat sisamat nalunaarutip nassuiarpai.

Kalaallit Nunaanni inuussutissarsiummik ingerlataqarneq pillugu Inatsisartut inatsisaat nr. 12, 12. november 2001-imeersoq

Inuussutissarsiummik ingerlataqarnermut erseqqinnerusunik piumasaqaatinik aalajangersaanissamik inatsit siunertaqarpoq.

Niuernerup ammanerulersinnera nunarsuarmilu siaruarnera ilutigalugit suliffeqarfiusut tamaasa iluini niuertut nalunaarsornissaannut pisortat piumasaqaataat annikillisimavoq. Minnerunngitsumik niuertut inuussutissarsiorfinnut akileraartartunullu nalunaarsuisarfinni nalunaarsugaareersimanerat pissutigalugu. Inuussutissarsiorsinnaanermut allagartaqarnissamut piumasaqaatip attannissaanut pisariaqartitsineq isigineqarunnaarpoq, taamaattumik pisortat nakkutilliinerannut pisariaqartutut isigineqanngimmat inuussutissarsiorsinnaanermut allagartap atorunnaarsinnissaa sulissutigineqarpoq.

Inatsisiliornerit assigiinngitsut suli inuussutissarsiorsinnaanermut allagartamik piumasaqaateqartoqarneranik aalajangersakkanik imaqarmata akitsuummik akiliuteqarluni inuussutissarsiorsinnaanermut allagartamik pissarsinissaq attanneqarpoq, tassalu inatsisaasuni allani inuussutissarsiorsinnaanermut allagaqartaqarneq piumasaqaataagaangat. Inatsisaasunit allanit inuussutissarsiorsinnaanermut allagartaqarnissamik piumasaqaatip atorunnaarsinnissaa naatsorsuutigineqariartortillugu inuussutissarsiorsinnaanermut allagartat taamatut ittuusut atuukkunnaavikkumaarput.

Inatsisaasumik allannguuteqarneq; Kalaallit Nunaanni inuussutissarsiummik ingerlataqarneq pillugu Inatsisartut inatsisaata allanngortinneqarneranik Inatsisartut inatsisaat nr. 5, 27. marts 2006-imeersoq (Kalaallit Nunaanni Inuussutissarsiutinik Nalunaarsuiffimmi ingerlatseqatigiiffiit nalunaarsorneqartussaatitaanerat takornarianillu tikittoqarneranut il.il. atatillugu nioqquteqarfiup aalaakkaasup avataani nioqquteqartarneq pillugu maleruagassanik aalajangersaanissamut piginnaatitaaneq)

Kalaallit Nunaanni inuussutissarsiuteqaraanni Inuussutissarsiummik Ingerlataqartunik Nalunaarsuiffimmi IIN-imi nalunaarsugaasimanissaq inatsisaasumik allannguutip erseqqissarpaa. Inatsisissatut allannguutip nioqquteqarfiup aalaakkaasup avataani nioqquteqarnikkut inuit inatsisitigullu pineqartut inatsisaasumik allannguutip assigiisippai.

Nalunaarut; Inuussutissarsiuteqarsinnaanermut allagartamut akiliuteqartarneq pillugu Namminersornerullutik Oqartussat nalunaarutaat nr. 37, 29. december 1998-imeersoq

Inuussutissarsiuteqarsinnaanermut allagartamut taassuminngalu naqitanngortitsinermut akiliutissaq 200 kroniusoq nalunaarutip aalajangersaavigaa.

Nalunaarut; Neriniartarfiutilittut akunnittarfiutilittullu inuussutissarsiorsinnaanermut allagartaqarnermut akiliut pillugu Namminersornerullutik Oqartussat nalunaarutaat nr. 10, 9. maj 2000-imeersoq.

Inuussutissarsiorsinnaanermut allagartamut akiliut 200 kr.-usoq aalajangersaavigaa.

Nalunaarut; Aktiaateqarluni piginneqataassuteqarlunilu ingerlatseqatigiiffiit inuussutissarsiorsinnaanermut allagartartaarsinnaanerannut piumasaqaatit pillugit Namminersornerullutik Oqartussat nalunaarutaat nr. 20, 1. juni 2001-imeersoq

Aktiaateqarluni piginneqataassuteqarlunilu ingerlatseqatigiiffiit inuussutissarsiorsinnaanermut allagartartaarsinnaanerannut piumasaqaataasut erseqqissaaviginissaat nalunaarutip siunertaraa.

Inatsisartut peqqussutaat nr. 5, 22. november 1984-imeersoq kalaallit tunisassiaasa avammut nioqqutigineqartarnerat pillugu akuersissuteqartarnermut

Tunisassianik Kalaallit Nunaanneersunik suliffeqarfiit pisortanit namminersortunillu pigineqartut tamarmik avammut tunisinissamik kissaateqartut Namminersorlutik Oqartussanit avammut tunisinissamik akuersissummik pigisaqassapput.

Namminerssornerullutik Oqartussat nalunaarutaat nr. 33, 19. december 1985-meersoq avammut tunisaqarsinnaanermut akuersissutinut tunngasoq

Avammut annissuinissamik qinnuteqartoq paasissutissanik sunik Namminersorlutik Oqartussanut nassiussissanersoq nalunaarummi aalajangersarneqarpoq.

Unammilleqatigiinneq pillugu Inatsisartut inatsisaat nr. 1, 15. maj 2014-imeersoq (unammilleqatigiinnermut inatsit)

Suliffeqarfinnut pisortanit pigineqartunut aalajangersimasunut tutsinneqarsimasunik tapiissutit utertillugit akilernissaat pillugu Namminersornerullutik Oqartussat nalunaarutaat nr. 18, 27. juni 2008-imeersoq

Unammilleqatigiinneq pillugu inatsisartut inatsisaanni kaaviiaartitat ilaalu ilanngullugit naatsorsortarnerannut Namminersornerullutik Oqartussat nalunaarutaat nr. 22, 1. juli 2008-imeersoq

Atuisartunut pisisarturtullu siunnersuisartoqatigiit, tuniniaasarneq, nalunaaqutsersuisarneq, akit aamma atuisartunut pisisartunullu maalaaruteqartarfittut ataatsimiititaliat pillugit Inatsisartut inatsisaat nr. 10, 13. november 1986-imeersoq

Akinik misissuisarnerit pillugit Namminersornerullutik Oqartussat nalunaarutaat nr. 28 28. november 1996-imeersoq