Ujaruk

Nunaqarfinnut aningaassalissutissanut qinnuteqarfissat

2018-imut Aningaasanut inatsimmi konto pingaarneq 64.01.05 tunngavigalugu tunisassiorfinnut ingerlatsinissamik isumaqatigiissutinut tapiissuteqartoqarpoq.

Suliffeqarfiit soqutiginnittut uunga qinnuteqaat nassiussinnaavaat:

Inuussutissarsiornermut Nukissiuuteqarnermullu Naalakkersuisoqarfik
Postboks 1601
3900 Nuuk

Email: isiin@nanoq.gl 
Oqarasuaat: 34 50 00
Telefax: 34 63 64

1. Qinnuteqarnermut ingerlassassaq

Inuussutissarsiornermut Nukissiuuteqarnermullu Naalakkersuisoqarfimmut suliffeqarfiit soqutiginnittut qinnuteqaatertik, ilanngussanik pingaarutilinnik ilaligaq (takuuk imm. 4) nassiutissavaat.

Qinnuteqartumit imaluunniit sumiiffinnit allanit ilassutitut paasissutissanik pissarsiornissaminut Inuussutissarsiornermut Nukissiuuteqarnermullu Naalakkersuisoqarfik imminut pisussaatippoq. Paasissutissat taama ittut qinnuteqaatip tamakkiisumik suliarineqarneranut ilaatinneqassapput.

Neqerooruteqarfimmi (2018-imi) qinnuteqaatit takkuttut suliarineqartuassapput. Taamaattumik aalajangersimasumik qinnuteqarneq killiligaanngilaq.

Qinnutaat akuerineqarpat suliffeqarfik pineqartoq attavigineqassaaq, taamaalinerani Inuussutissarsiornermut Nukissiuuteqarnermullu Naalakkersuisoqarfiup suliffeqarfiullu pingaarutillup akornanni kiffartuussinissamik isumaqatigiissusiortoqassaaq.

2. Sunut tapiissutit qinnutigineqarsinnaappat

Tunisassiorfinnut tunngatillugu ingerlatsinermik isumaqatigiissutinut tapiissutit qinnutigineqarsinnaapput, aalisarnerup piniarnerullu iluani, kiisalu nunaqarfinni isorlilunerusunilu tunitsivinni tunisassiornermi suliffeqartitsinerup suliaqartarnerullu siuarsarlugillu qularnaarnissaat siunertaralugit.

Ukiumut ilivitsumut 2018-imut ingerlatsinermut aningaasaliissutit qinnuteqaataasinnaapput.

3. Atugassarititat

Tunisassiorfinnut ingerlatsinermut aningaasaliissutinik agguaassassat tunngavigalugit kiffartuussinissamik isumaqatigiissummi atsiorneqartumiipput suliffeqarfimmut malitassatut atugassarititat piumasaqaatillu arlallit, ilaallutik:

• Suliniutip siuarsarneranik akuttoqatigiissitamik nalunaaruteqartarnissamut pisussaaffik
• Piffissamut isumaqatigiissuteqarfimmut suliffeqarfiup ukiumoortumik naatsorsuutaasa nassiuttarnissaannut pisussaaffik
• Qinnuteqaammut aamma/imaluunniit kiffartuussinissamik isumaqatigiissumut tunngasunik Inuussutissarsiornermut Nukissiuuteqarnermullu Naalakkersuisoqarfiup saaffiginnissutaanik akissuteqartarnissamut pisussaaffik
• Isumaqatigiissummi aalajangersakkanik naleqqussaanissamut atugassarititat
• Kiffartuussinissamik isumaqatigiissut sumiginnarneqarpat, imaluunniit suliffeqarfik akiliisinnaajunnaarpat assigisaanilluunniit kiffartuussinissamik isumaqatigiissutip atorunnaarsinnissaanut atugassarititat.

4. Qinnuteqartumut qinnuteqaammullu piumasaqaatit

Qinnuteqaat ingerlatsinermut aningaasaliiffigineqartinnagu qinnuteqartumut qinnuteqaammullu arlalinnik piumasaqaateqartoqarpoq.

4.1. Qinnuteqartumut piumasaqaatit
Ingerlatsinermut aningaasaliissutinik pissarsinissamut qinnuteqartumut suliffeqarfik piumasaqaatinik makkuninnga naapertuutsitsissaaq:

• Ingerlatseqatigiiffik Kalaallit Nunaanni angerlarsimaffeqassaaq
• Ingerlatseqatigiiffik nammineq aningaasaatigisaminik atuisinnaassaaq, taamaalillunilu akiliisinnaajunnaarsimassanani, suliffik unitsinneqaqqajaassanani, imaluunniit taamannik sanilliunneqarsinnaasunik pissutsinik atugaqarfiussanani.

4.2. Qinnuteqaammut piumasaqaatit
Ingerlatsinermut aningaasaliissutinik pissarsinissamut qinnuteqaat minnerpaamik paasissutissanik makkuninnga imaqassaaq:
  • Suliffeqarfiup aqqa, najugaa attaveqarfinnullu paasissutissat
  • Suliffeqarfiup IIN-normua
  • Naatsorsuutit iluarsaassat nassiunneri, imaluunniit suliffeqarfinnut nutaanut suliassanut pilersaarut naammattoq
  • Suliffeqarfinnut nutaanut kukkunersiusoqarsimaneranik assingusumilluuniit piumasaqaateqartoqarsinnaavoq
  • Siulersuisut aamma piginnittuusut pillugit paasissutissat pissarsiarisinnaasat tamarmik
  • Piffissamut isumaqatigiissuteqarfissatut qinnuteqarfiusumut missingersuusiaq
  • Qinnuteqartoq kingusinnerusukkut paasissutissanik sukumiinerusunik piumaffigineqarsinnaavoq qinnuteqaatip nalilersorneranut atugassanik
5. Tunniussinissamut najoqqutassat

Qinnuteqaatit takkuttut nalilersornissaannut najoqqutassat makku atorneqarumaarput. Qinnuteqaatit missiliuutigisatut naammaginartumik tunniussinissamik najoqqutassanik naapertuutsitsisut ingerlatsinermut aningaasaliissutinik tunniussaqarfiussapput.

• Suliniutip suussusia annertussusialu
• Tunisassiorfimmi ilassutitut sulisussat amerlassusissaasa naatsorsuutigineri
• Qinnuteqartup misilittagai sulianillu ilisimasaqassusia
• Ingerlatsivimmut suliarisartakkat annertussusaat
• Nunaqarfimmi/illoqarfimmi pineqartumi allanik qinigassanik suliffeqartitsinissamut periarfissaqartoqarneranik nalilersuineq.