Ujaruk

Inuussutissarsiut

Kalaallit Nunaanni inuussutissarsiorneq allanngoriartorfimmiippoq. Siusinnerusukkut suliffissat amerlasuut piniarnermi aalisarnermilu kiisalu Namminersorlutik Oqartussat suliffeqarfiutaanni inissisimaneranniit maanna siunissami suliffissat amerlasuut namminersortut suliffiutaanniittunut, takornariartitsinermiittunut aamma nunami inuussutissarsiutiniittunut, kiisalu piffissami ungasinnerumaami aamma aatsitassarsiornermiittunut. Utoqqarnik isumaginninnermilu ingerlatsinerni siunissami sulisussanik piukkunnarnerusunik annertusiartortumik atorfissaqartitsisoqartussaavoq. 

Kalaallit Nunaanni inuussutissarsiornikkut ineriartortitsisoqarnissaa suliniuteqartoqarnissaalu pisariaqartinneqarpoq. Inuussutissarsiorneq uummaarissoq innuttaasunut atugassarititaasunik pitsaanerusunik pilersitsisarpoq, aningaasarsiornikkut siuariartortitsinermik suliniutinillu malitseqartartumik, suliffissanik inuiaqatigiinnullu isaatitassanik kinguneqartartunik. Taamaattumik Naalakkersuisut ukiuni kingullerni ilungersuutigalugu sulissutigisimavaat inuussutissarsiornermik ingerlatsinermi killiliussaasut nutarterneqarnissaat, nunatsinni inuussutissarsiortut siunissami ineriartortitsinissaannut periarfissat siuariartornermik atugarissaarnermillu kinguneqartussat aqqutissiuukkumallugit.

Inuussutissarsiutit aallunneqartut tamatumani ilaatigut tassaapput takornariartitsineq, sermimik imermillu avammut niueruteqartarneq, nioqqutissiornermik ingerlatsisinnaaneq nukissiuutinit mingu-itsunit akikitsunillu nukik iluaqutigalugu, uumassusillit sananeqaataasigut kingornuttagaasunik isumalluutit, puisit amiinit nioqqutissianik avammut niueruteqartarnitta annertunerulersinnissaa il.il.