Ujaruk

Sulisartut avataaneersut

Kalaallit Nunaanni inuussutissarsiummik ingerlatalik kalaallinik nunaqavissunik sulisussarsisinnaanngikkuni sulisitsisoq avataanit sulisussarsiornissamut qinnuteqarnissamut periarfissaqarpoq.

Kalaallit Nunaannut suliffissarsiortut killilersimaarnissaat pillugu Inatsisartut inatsisaat nr. 27, 30. oktober 1992-imeersup kalaallit sulisartut Kalaallit Nunaanni sulinissamut salliutinneqartarnissaat qulakkeerniarpaa. Taamaattumik sulisitsisoq avataaneersunik atorfinitsitsiniaruni kommunimut akuersissummik qinnuteqaqqaartarnissamut akisussaaffeqarpoq. Tamanna suliassat makkununnga atuuppoq, taakkuninnga isumaginninnissaq:

  1. atorfinni suliamik ilinniagaqarsimannissamik piumasaqarfiunngippat,
  2. atorfinni suliassamut naapertuuttumik sulisitsisumi ilinniagaqaqqaarnermik, inuutissarsiutinut tunngaviusumik ilinniagaqaqqaarnermik imaluunniit Siamasissumik Tunngaviusumik Ilinniartitaanermi ilinniagaqaqqaarnermik pisariaqartitsippat,
  3. atorfinni annerusumik, soorlu inunnik isumaginnittussatut aamma isumaginninnermi siunnersortissatut, ilinniagaqaqqaarnermik pisariaqartitsippat, aamma
  4. atorfinni imarsiornerup tungaatigut annertunerusumik ilinniagaqaqqaarnermik pisariaqartitsippat.

Sulisitsisut www.suli.gl aqqutigalugu sulisunik inuttassarsiortassapput.

Sulisitsisut akisussaaffii

Sulisitsisoq avataaniit atorfinitsitsinissamut kommunimit akuersissummik pisimaguni piukkunnartumillu nassaarluni – nunat isumaqatigiissuteqarfiit avataanneersuni innuttaasut – Nunanit Avannarliit avataanneersut - sulinissaq siunertaralugu Kalaallit Nunaanni sulinissamut najugaqarnissamullu Udlændingestyrelsimi akuersissummik qinnuteqassapput.

Malittarisassat nammineq kajumissuseq naapertorlugu akissarsiaqaranilu sulinermut aamma atuupput.

Sulisup akisussaaffii

Innuttaasut Nunanit Avannarlerninngaanneersut Kalaallit Nunaanni najugaqarnissamut sulinissamullu akuersissuteqaratik sulisinnaapput, kisiannili atorfik Kalaallit Nunaannut suliffissarsiortut killilersimaarnissaat pillugu Inatsisartut Inatsisaat nr. 27, 30. oktober 1992-imeersumut ilaatinneqassappat avataaneersunik sulisoqarnissamut kommunimit akuersissummik sulisitsisup peqarnissaa pisariaqartuassaaq.

Nuna allamiup sulinermut akuersissummik peqarnissani nammineq akisussaaffigaa. Nuna allamioq Kalaallit Nunaanni unioqqutitsilluni suliguni, taanna Kalaallit Nunaanniit anisitaasinnaavoq, aamma nuna allamioq sulisitsisorlu Kalaallit Nunaanni pinerluttulerineq pillugu inatsit atorlugu pineqaatissinneqarlutik eqqartuunneqarsinnaapput.

Nuna allamioq ilaqutariinnut ataatsimoortitsitaareersimaguni Kalaallit Nunaanni sulinissamut akuersissummik qinnuteqartariaqanngilaq.

Kalaallit Nunaat aamma Danmark sumiiffiupput angalaffigineqarsinnaasut avissaaqqasut. Nunami allamiumut Danmarkimi najugaqarsinnaatitaanermut akuersissut Kalaallit Nunaanniissinnaanermut piginnaatitsinngilaq. Taamatuttaarlu nunamut allamiumut Kalaallit Nunaanni najugaqarsinnaatitaanermut akuersissut Danmarkimiissinnaanermut piginnaatitsinngilaq.

Najugaqarnissamut sulinissamulluunniit akuersissutinut Udlændingestyrelsen aalajangiisussatut oqartussaasuuvoq. Inuussutissarsiornermut, Aatsitassanut Suliffeqarnermullu Naalak-kersuisoqarfik Politiillu suliani illuatungiusutut taamaallaat tusarniarfigineqartarput.

Kalaallit Nunaanni najugaqarsinnaatitaanermut sulisinnaatitaanermullu tunngasutut paasissutissat uani takukkit.